Hasanboy Do'smatov shu oy Moskvada ringga chiqadi + FOTO

Do'smatov 28 avgust kuni Rossiya Federaciyasi poytaxti Moskva shahrida tashkil etiladigan professional boks kechasida ringga ko'tariladi. Hozircha raqib nomi tashkilotchilar tomonidan oshkor qilinmagan. 

Bu Hasanboy uchun prof faoliyatidagi to'rtinchi jang bo'ladi. U oxirgi jangini 3 aprel kuni "Humo Arena"da Muxlis Kizotaga qarshi o'tkazib, g'alabaga erishgandi. 10 raundga mo'ljallangan jang vakant bo'lib turgan WBA International kamari uchun kechgan va unda charm qo'lqop ustamiz raqibini uchinchi raundda nokautga uchratgan edi.   

Moskvadagi boks oqshomining markaziy jangi sifatida Rossiya chempionlik kamari uchun kechadigan Yusup Kediev - Gasan Gasanov to'qnashuvi ko'rsatilgan. Hasanboy Do'smatovning jangi anderkard jangdan avval bo'lib o'tadi. 

SHuningdek, 28 avgust kungi boks kechasida o'zbekistonlik bokschilardan Bahromjon Fozilov, Mirzakamol Nematov va Eldor Abduqodirov ham o'z janglarini o'tkazishadi. Hozircha ularning raqiblari ham malum emas.