III Yoshlar Osiyo o'yinlari. O'zbekiston o'z o'rnida, medallarimiz 58 taga etdi, qo'shnilarimiz bizga yaqinlashib olishdi (+to'liq jadval)

Ayni daqiqalarga qadar O'zbekiston terma jamoasi sport delegaciyasi medallar jamg'arish bo'yicha jami 58 ta medal qo'lga kiritib ulgurdi. Yoshlarimiz 25 ta oltin, 10 ta kumush, 23 ta bronza medaliga ega chiqishdi. Bugunning hisobidan ilk medalimiz ham oltin bo'ldi. Hozirgina og'ir atletikachimiz Dilnura Xoldorova (-77 kg) dast ko'tarishda 95 kg natija bilan chempion bo'ldi. Medallar jamg'arish bo'yicha terma jamoamiz hamon 2-o'rinni mustahkam egallab turibdi. 

Uchinchi o'ringa Qozog'iston terma jamoasi ko'tarilib olgani etiborga molik holat. Qo'shnilarimiz kecha 6 ta oltin medal qo'lga kiritganliklari ortidan 3-o'ringa yuqorilashdi. Ular hisobida 18 ta oltin, 21 ta kumush, 31 ta bronza, jami 70 ta medal bor. SHu kungacha 3-o'rin Tailand terma jamoasiga tegishli edi. Tailandliklar 5-o'ringa tushib ketishdi. Eron Islom Respublikasi 17 ta oltin, 11 ta kumush, 26 ta bronza medali bilan 4-o'ringa ko'tarildi.   

Osiyo sporti gegemoni Xitoy terma jamoasining umumiy medallari 122 taga etib ulgurdi. CHin yurti vakillari 54 ta oltin, 42 ta kumush, 26 ta bronza medaliga sazovor bo'lishgan. Yon qo'shnilarimizdan Tojikiston (2 ta oltin, 2 ta kumush, 12 ta bronza) bilan 18, Turkmaniston (1 ta oltin, 2 ta bronza) 25, Qirg'iz Respublikasi (7 ta kumush, 11 ta bronza) 28, Afg'oniston (2 ta kumush, 3 ta bronza) bilan 30-o'rinni band etgan.