Ikki erkin kurashchimiz Osiyo chempionatining finalida!

Ayni daqiqalarda qita chempionatining ikkinchi kungi saralash bellashuvlari o'tkazilpyati. Bugun 5 nafar erkin kurashchimiz medallar yo'lida bahslarga kirishgandi. Ulardan 2 nafari finalga yo'l oldi. 

-86 kg vazn toifasidagi terma jamoamiz azosi, Parij-2024 Olimpiadasi licenzianti  SHavrail SHapiev 1/4 finalda yaponiyalik Tatsuya SHirai, 1/2 finalda esa mezbonlar vakili Atai Izabekovni mag'lubiyatga uchratdi. SHapievning oltin medal uchun kechadigan bellashuvdagi raqibi qozog'istonlik Azamat Dauletbekov bo'ladi. 

-92 kg vaznda yurtimiz sharafini himoya qilayotgan SHerzod Poyonov 1/4 finalda mo'g'ulistonlik Batzul Damjin, 1/2 finalda Qirg'iz Respublikasi kurashchisi Nurtilek Karipbaevni taslim etdi. Poyonov final uchrashuvida eronlik Amirhusseyn Firuzpurbandpeyga qarshi gilamga chiqadi. 

Qolgan uch kurashchimiz saralash bahslarida raqiblariga imkoniyatni boy berib, Osiyo chempionatidagi ishtiroklarini erta yakunlashdi. -61 kg vazndagi Sardor Ro'zimov 1/8 finalda hindistonlik Akash Dahiyaga, -74 kg vazn toifasidagi Zafarbek Otaxonov 1/8 finalda eronlik Husseyn Abouzaripashakolayiga, 125 kg vaznda kurashgan Sardorbek Xolmatov esa 1/4 finalda mo'g'ulistonlik Odgerel Batxishigga yutqazib qo'ydi. 

Malumot uchun, final bellashuvlari bizning vaqt bilan soat 17:00da boshlanadi.