Ikki tennis malikamiz qatnashadigan Australian Open 2026 asosiy to'riga qura tashlandi

O'z tarixida 114-marotaba tashkil etilayotgan, umumiy mukofot jamg'armasi rekord daraja - 111,5 million AQSH dollariga etkazilgan Avstraliya Ochiq chempionatining ayollar o'rtasidagi asosiy to'r bahslarida mamlakatimizning birinchi hamda uchinchi raketkalari - Kamilla Rahimova va Polina Kudermetova yurtimiz sharafini himoya qiladi. Saralash turnirida omadini sinab ko'rgan ikkinchi raketkamiz Mariya Timofeeva esa ilk bosqichdayoq yaponiyalik tennischiga yutqazib qo'ygandi. 

Qura natijasiga ko'ra, Polina Kudermetova kvalifikaciya, yani saralash raundi g'oliblaridan biriga qarshi kortga chiqadi. Polina g'alaba qozongan taqdirda, ikkinchi davrada daniyalik Klara Tasuon yoki vengriyalik Dalma Galfiga ro'baro' bo'ladi. Kamilla Rahimovani esa jiddiy sinov kutib turibdi. U dunyoning uchinchi raketkasi, amerikalik Koko Goff bilan hisob-kitob qiladi. Ushbu juftlik g'olibini ikkinchi bosqichda asosiy to'rga imtiyozli yo'llanma asosida qo'yilgan amerikalik 45 yoshli Vinus Uilyams yoki serbiyalik Olga Danilovich kutib oladi. 

Dunyoning birinchi raketkasi belaruslik Arina Sobolenko Avstraliya Ochiq chempionatidagi ishtirokini wild card, yani imtiyozli yo'llanma sohibalaridan biri franciyalik Tyancoa Rakotomangi Radjaonaga qarshi uchrashuv bilan boshlaydi. Sayyoramizning ikkinchi raketkasi polshalik Iga SHvyontek esa kvalifikaciya g'olibalaridan birini sinovdan o'tkazadi.      

Australian Open 2026 asosiy to'r bahslari 18 yanvar kuni boshlanadi. Musobaqaning amaldagi g'olibasi amerikalik Medison Kiz hisoblanadi. U o'tgan yilgi finalda Arina Sobolenkoni uch set natijasiga ko'ra mag'lubiyatga uchratgandi. Medison chempionlik himoyasini ukrainalik Oleksandra Oliynikovaga qarshi kechadigan uchrashuv bilan boshlaydi.