Ikki yunon-rum kurashchimiz Jahon chempionati shohsupasida + FOTO

Dunyo birinchiligining ikkinchi kuni yunon-rum kurashi bo'yicha qolgan vazn toifalarida g'olib va sovrindorlar malum bo'ldi. Uch yunon-rum kurashchimiz bronza medali uchun gilamga chiqdi va ulardan ikki nafari raqiblarini engib, jahon chempionati sovrindoriga aylandi. 

Hojiakbar Qo'chqorov (55 kg) moldovalik Maksim Sarmanovni 9-1, Behruzbek Aliev (72 kg) esa armanistonlik Gor Xachatryanni so'nggi ball (7-7) evaziga taslim etdi. 97 kg vazndagi Faxrikamol Komiljonov o'tish bellashuvida yaponiyalik Ryosey Katamtsuni 9-1 hisobida dog'da qoldirdi. Ammo bronza medali uchun bo'lib o'tgan bahsda finlyandiyalik raqibi Pauli Perkyuga yutqazib qo'ydi. 

SHu tariqa, yunon-rum kurashi bo'yicha O'zbekiston U20 terma jamoasi jahon chempionatidagi ishtirokini 1 ta oltin, 2 ta bronza medali bilan yakunladi. 63 kg vazn toifasida yurtimiz sharafini himoya qilgan Quvonchbek Ismoilov birinchi kungi bellashuvlarda jahon chempioniga aylangandi. Hamyurtimiz hal qiluvchi final bahsida rossiyalik Salim Karmaxovni 9:7 hisobida mag'lubiyatga uchratgan edi. Ismoilov finalga qadar xitoylik Jaojian Vangni 14:5, finlyandiyalik Matias Arpyanenni 9:8, ozarbayjonlik Tural Ahmadovni 3:2, ekvadorlik Veliz Karrasedoni 3:2 hisobida taslim etdi. 

Kecha shuningdek, ayollar kurashi bo'yicha ham bahslar boshlandi. O'zbekiston terma jamoasining ikki vakilasi Nilufar Nurmuhammadova (50 kg) va Sohibjamol Esbosinova (53 kg) yarim finalga qadar etib keldi va raqibalariga imkoniyatni boy berdi. Ular bugun kechki final blokida bronza medali uchun gilamga chiqadi. Kurashchi qizlarimizning bronza uchun bahsdagi raqibalari o'tish bellashuvlarida aniqlanadi.