Jahon chempionati. Bugun to'rt polvonimiz gilamga chiqadi, ularning raqiblari malum

Bugun “Papp Laszlo Arena” mezbonlik qilayotgan jahon chempionatining oltinchi kungi bellashuvlarida polvonlar 55, 63, 72 hamda 82 kg vazn toifalarida gilamga chiqishadi. Yurtimiz sharafini to'rt nafar yunon-rum kurashchimiz jahon chempionati medallari uchun bahslarga kirishadi. 

-55 kg vazn toifasida yurtimiz sport sharafini Ilhom Bahromov himoya qiladi. Nankin o'smirlar Olimpiadasi g'olibi 1/8 finaldan bahslarga qo'shiladi va bu bosqichda u ukrainalik Aleksandr Trifonovga qarshi gilamga chiqadi. 

-63 kg vazn toifasida O'zbekiston nomidan Rio Olimpiadasi sovrindori Elmurat Tasmuradov ishtirok etadi. U ilk kvalifikaciya belaruslik Soslan Daurov bilan to'qnash keladi. 

-72 kg vaznda Ashxobodda o'tgan Yopiq inshoatlardagi Osiyo o'yinlari sovrindori Aram Vardanyan o'z imkoniyatini sinovdan o'tkazadi. Aramning ilk saralashdagi raqibi ukrainalik Parviz Nasibov bo'ladi. Agar u Parvizdan ustun kelsa, 1/8 finalda qozog'istonlik Demeu Jadraev bilan ro'baro' keladi.

-82 kg vazn toifasida esa Nurbek Xoshimbekovdan medal kutamiz. U qura natijasiga ko'ra birinchi kvalifikaciya bahslaridan kurashga qo'shiladi. Uning raqibi xitoylik Jun Jie Na bo'ladi. G'olib chiqqan taqdirda nimchorak finalda qirg'izistonlik Atabek Azisbekov bilan uchrashadi. 

Eslatib o'tamiz, jahon chempionatining birinchi kungi bahslarida -74 kg vazn toifasida gilamga chiqqan hamyurtimiz Osiyo o'yinlari g'olibi Bekzod Abdurahmonov terma jamoamizga bronza medalini taqdim etgandi. Hozircha ana shu medal yagonaligini saqlab turibdi.