Jahon chempionatida 13 ta medal qo'lga kiritgan polvonlarimiz Vatanga qaytishdi + FOTO

Mazkur jahon chempionatida belbog'li kurash bo'yicha erkaklar va ayollardan iborat terma jamoamiz (bosh murabbiy Azamjon SHokirjonov) ham munosib ishtirok etdi.

11 dekabr kuni  start berilgan jahon chempionati musobaqasida erkaklar belbog'li kurashning  erkin va klassik yo'nalishida 8 ta vazn toifasida, xotin-qizlar esa 5 ta vazn toifasida kurash tushishdi.

Quvonarlisi, 35 ta davlatdan yig'ilgan eng sara sportchilar orasida polvonlarimiz 3 ta oltin, 5 ta kumush, 5 ta bronza medallarini egallashga muvaffaq bo'lib, umumjamoa hisobida faxrli ikkinchi o'rinni qo'lga kiritdi va kuchlilar qatoridan joy olishdi.  

Belbog'li kurashning erkin yo'nalish bo'yicha bellashuvlarda   sportchilardan 57 kg. vazn toifasida Oybekjon Hamidov (Namangan),  68 kg.da Oybek Sultonov (Andijon), 52 kg.da Farangiz Abdunabieva (Sirdaryo) lar barcha raqiblarini engib, oltin medallarni qo'lga kiritishdi.

82 kg.da Husniddin Ro'ziev (Andijon),  100 kg.da Azamjon Anvarjonov (Andijon), +100 kg.da SHerzod Rahimov (Farg'ona), 58 kg.da Manzuraoy Mo'ydinova (Farg'ona) kumush medallariga ega chiqishgan bo'lishsa, 62 kg.da Murodjon Rahimov (Xorazm), 52 kg.da Madina Akramova (Andijon), 66 kg.da Zemfira Azatova (Qoraqalpog'iston), +76 kg.da Anife Kurtseitova (Andijon) lar uchinchi o'rinni band etib, bronza medal sohiblariga aylanishdi.

Belbog'li kurashning klassik yo'nalishida polvonlarimizdan 62 kg.da Husanboy Nosirov (Andijon) uchinchi o'rinni egallagan bo'lsa, 100 kg. da kurash tushgan Zaylobiddin Ortiqov ikkinchi o'rinni band etib, kumush medal egasiga aylandi. 

Jahon chempionati bellashuvlari yakuniga etgach, tantanali tarzdagi taqdirlash marosimi bo'lib o'tdi. G'olib va sovrindorlar medal, diplom, kubok va esdalik sovg'alari bilan mukofotlanishdi. 

Jahon chempionatida muvaffaqiyatli ishtirok etgan  O'zbekiston belbog'li kurash federaciyasi raisi Ravshan Dastirov boshchiligidagi delegaciya azolari bugun, 14 dekabr erta tongda Toshkentga qaytib keldi.

Poytaxtimizlagi “Islom Karimov” nomidagi xalqaro aeroportida jahon chempionati g'olib va sovrindorlar ota-onalar, ustoz-murabbiylari, O'zbekiston belbog'li kurash federaciyasi vakillaridan iborat keng jamoatchilik tomonidan munosib kutib olindi.

Ilhom RAHMONOV tayyorladi