Jahon chempionatida medal olgan ilk o'zbekistonlik - Farhod To'raevni tabriklaymiz!

Farhod aka oilaviy muhit tasirida, otasi, Olot dzyudo maktabi asoschisi, O'zbekistonda xizmat ko'rsatgan murabbiy Rustam To'raevning izidan borib dzyudo sport turini tanladi. Bir sportchi erishish orzusida bo'lgan natijalarni qayd etdi. 

Xalqaro toifadagi sport ustasi Farhod To'raev 1997 yili Filippinda o'tgan Osiyo chempionatining kumush, o'sha yili Xorvatiya davlati mezbonlik qilgan yoshlar o'rtasidagi jahon chempionatida bronza medaliga sazovor bo'ldi. 1999 yilda esa Angliyaning Birmingem shahrida bo'lib o'tgan kattalar o'rtasidagi jahon chempionatida kumush medalga ega chiqdi. Bu bilan u mustaqil O'zbekistonga dzyudo bo'yicha jahon chempionatining ilk medalini taqdim etgan ilk sportchiga aylandi. 

SHuningdek, bugungi kun qahramoni ko'plab nufuzli xalqaro musobaqalar, "Katta Dubulg'a", Gran-pri turkumiga kiruvchi turnirlar g'olib va sovrindori bo'ldi. Jonkuyar murabbiy ko'plab nomdor sportchilarning ustozi hisoblanadi. Istedodlarni tayyorlash jarayoni bugungi kunda ham davom etmoqda. 

Farhod To'raevni bugungi tavallud ayyomi bilan muborakbod etamiz.