Jahonobodda belbog'li kurash bo'yicha ochiq turnir o'tkazildi

9 may — Xotira va qadrlash kuni munosabati bilan tashkil etilgan ushbu turnir shu hududda yashab o'tgan nomdor polvonlar, murabbiy-ustozlar xotirasiga bag'ishlandi.  

Musobaqa doirasida turnirning ochilish marosimi o'tkazildi. Unda Rishton tumani hokimi Bahodirjon Xoliqov sportchilarni qutlab, ularga omad tiladi. 

Rishton tumani hokimligi, tuman prokuraturasi, Farg'ona viloyat sport boshqarmasi, O'zbekiston belbog'li kurash federaciyasi, Federaciyaning Farg'ona viloyat bo'limi hamda homiylar hamkorligida o'tgan mazkur ochiq turnirda yurtimiz polvonlaridan tashqari Tojikiston va Qirg'iz Respublikasidan ham sportchilar ishtirok etdi.

SHu kuni ko'p sonli belbog'li kurash muxlislari polvonlarning o'zaro shiddatli bellashuvlarini tomosha qilib ochig'i, yayradi. Faxriy polvonlarga hurmat va ehtirom ko'rsatilib, esdalik sovg'alari ulashildi. 

SHuningdek, Jahonobod qishlog'ida yashab, belbog'li kurash bo'yicha nom qozongan marhum polvonlar Ahmadjon Egamov, Abduqodir Jumaboev, Azim Qo'ldoshev, Orifjon Sobirov, Mullahoji Sultonov, Beg'amjon Ermatov, Bekzodbek Normatov, Abdulla Mamayusupovlar nomi yodga olindi.  

Turnir tashkilotchilardan Farg'ona viloyati belbog'li kurash federaciyasi ijrochi direktori, xalqaro toifadagi hakam Miranshoh Ro'ziev hamda Zohidbek polvon Ismoilov boshchiligidagi hakamlar polvonlarning kurashini baholab borishdi.

Sayil kurashi tarzida o'tkazilgan bellashuvlarda Zaylobiddin Ortiqov, Husniddin Ro'ziev, Azamjon Anvarjonov, Bobur To'xtasinov kabi o'nlab nomdor polvonlar bor mahoratlarini namoyish etishdi. Aynan ushbu polvonlarning o'zaro bellashuvlari ananaviy turnirga yanada joziba bag'ishladi. 

Turnirda g'oliblikka erishgan polvonlarga tashkilotchilar tomonidan qimmatbaho esdalik sovg'alari topshirildi. 

Ilhom RAHMONOV tayyorladi