Janob Kim Jong Koreya Respublikasi Prezidenti etirofiga sazovor bo'ldi

Taqdirlash marosimi Koreya Respublikasining Toshkentdagi elchixonasida bo'lib o'tdi. Koreya Respublikasining O'zbekistondagi favqulodda va muxtor elchisi janob Kim Xi Sang tomonidan yorliqning asl nusxasi koreyalik kurash fidoiysiga tantanali ravishda topshirildi.

Maqtov yorlig'ida jumladan shunday so'zlar bor: “Erkinlik va demokratiyaning asosiy tartibi asosida tinch yo'l bilan birlashtirish faoliyati orqali Koreya yarim orolini erkin, tinch va farovon qilishga qo'shgan hissangiz maqtovga sazovor! Prezident Yun Seok-Yol”.

Kim Jong dunyoda milliy sportimiz kurashni rivojlantirish, yosh va tajribali hakamlarni tayyorlash bo'yicha ko'plab ishlarni amalga oshirgan kurash mutaxassisi hisoblanadi. U uzoq yillar Koreya Kurash associaciyasi Prezidenti, Osiyo-Okeaniya Kurash konfederaciyasi vice-prezidenti, Xalqaro Kurash associaciyasi Hakamlik qo'mitasi raisi sifatida faoliyat olib borgan.

Ayni kunlarda Xalqaro Kurash instituti eksperti, O'zDJTSU faxriy professori, O'zDJTSU Milliy Kurash turlari nazariyasi va uslubiyati kafedrasi o'qituvchisi lavozimlarida kurashning ilmiy asoslari, kurash hakamligi nazariyalarini tadqiq qilmoqda.

Uning muallifligida kurash hakamligi bo'yicha ko'plab o'quv va uslubiy qo'llanmalar, kitoblar hamda video darsliklar tayyorlangan.