Janubiy koreyalik mehmonlar O'zbekiston kurash federaciyasida bo'lishdi

Mehmonlar Toshkentdagi Kurash muzeyida bo'lishib, kurashning tarixi va buguni haqida hikoya qiluvchi eksponatlar, kurash haqidagi malumotlar bilan tanishdi hamda ushbu milliy sportimiz xalqaro maydonda zamonaviy va istiqbolli sport turi sifatida rivojlanishi uchun barcha imkoniyatlarga ega ekanligini etirof etishdi.

Ikki tomon o'rtasida tashkil etilgan o'zaro muloqotda O'zbekiston kurash federaciyasi raisining birinchi o'rinbosari, zamonaviy kurash qoidalari asoschisi K.Yusupov kurashni sport turi sifatida xalqaro maydonga olib chiqilishi yo'lidagi harakatlar, uning dunyo arenasidagi rivojlanishi, tarixi haqida so'zlab berdi. O'z navbatida mehmonlar Koreya milliy sport turi taekvandoni yozgi Olimpiya o'yinlariga kiritilishi borasida olib borilgan ishlar, harakatlar haqida malumot berdilar.

Uchrashuvda ikki tomonlama hamkorlik memorandumi imzolandi. Ushbu memorandumga ko'ra, kelajakda kurashni Olimpiya o'yinlari dasturiga kiritish uchun zarur shart-sharoitlar yaratish, jahon yoshlarini kurash sport turi bilan shug'ullanishga keng jalb etish, kurashni o'zbek brendi sifatida jahon durdonasiga aylantirish va xalqaro nufuzini yuksaltirish, mustahkamlash borasida hamkorlik qilinishiga kelishib olindi.