Jismoniy tarbiya fani o'qituvchilari malaka toifasini olish uchun test topshirmasligi rostmi?

AOKA huzuridagi shtabda o'tkazilgan brifingda Talim sifatini nazorat qilish davlat inspekciyasi Matbuot xizmati rahbari Feruza Madrahimova ushbu savolga javob berdi:

Vazirlar Mahkamasining 2020 yil 20 fevraldagi 106-son qarori bilan yuqori mehnat samaradorligiga erishayotgan jismoniy tarbiya fani o'qituvchilarini munosib rag'batlantirishni tashkil etish maqsadida bir qator qarorlariga o'zgartirish va qo'shimchalar kiritilgan edi. 

Jumladan, Maktabgacha, umumiy o'rta, o'rta maxsus, kasb-hunar va maktabdan tashqari davlat talim muassasalari pedagog kadrlarini attestaciyadan o'tkazish tartibi to'g'risidagi nizomga kiritilgan qo'shimchaga ko'ra, talim muassasalarining quyidagi jismoniy tarbiya fani o'qituvchilariga malaka toifasi (lavozim) to'g'ridan-to'g'ri (attestaciyadan o'tkazilmasdan) beriladi: 

- tuman (shahar) miqyosidagi sport musobaqalarining 1-o'rin sovrindorlarini tayyorlaganlarga – ikkinchi malaka toifasi (katta o'qituvchi lavozimi); 

- viloyat miqyosidagi sport musobaqalarining 1-o'rin sovrindorlarini tayyorlaganlarga – birinchi malaka toifasi (etakchi o'qituvchi lavozimi); 

- xalqaro hamda respublika miqyosidagi sport musobaqalarining 1, 2 va 3-o'rin sovrindorlarini tayyorlaganlarga – oliy malaka toifasi (bosh o'qituvchi lavozimi). 

SHuningdek, 2020 yilning 4 iyun kuni tegishli vazirlik va idoralarning «Maktabgacha, umumiy o'rta, o'rta maxsus, kasb-hunar va maktabdan tashqari davlat talim muassasalari pedagog kadrlarining attestaciya natijalarini baholash mezonlarini tasdiqlash haqida»gi qarorga o'zgartirish va qo'shimchalar kiritish to'g'risida” qarori Adliya vazirligidan ro'yxatdan o'tkazildi. 

Unga ko'ra jismoniy tarbiya fani o'qituvchilari malaka toifasi olish yoki uni himoya qilish uchun nazariy va amaliy sinovlarda ishtirok etishadi. 

Nazariy sinov 4 ta savoldan, amaliy sinov 4 ta jismoniy mashqdan iborat bo'ladi. Jismoniy mashqlar – 100 metrga yugurish, joyidan turib uzunlikka sakrash, erkaklar uchun turnikda tortilish , gimnastika o'rindig'iga tayanib, ayollar uchun qo'llarni bukish va yoyish, yotgan holda qo'llarni bosh orqasiga qo'yib gavdani ko'tarishdan iborat. Har bir topshiriqning belgilangan vaqtda, to'liq, to'g'ri va sifatli bajarilganligi belgilangan normativlarga asosan baholanadi.