Jismoniy tarbiya va sport vazirligi ishchi guruhi bugun Oltinko'l tumanida bo'lishdi

Kecha ishchi guruh vakillari Oltinko'l tumanida joylashgan bolalar-o'smirlar sport maktabida bo'lishdi. Ushbu tuman sportning gandbol, belbog'li kurash va futbol turlariga ixtisoslashtirilgan bo'lib, tuman aholisining keng qatlamlarini ham sportga jalb etish bo'yicha chora-tadbirlar ishlab chiqilgan.

Bugungi kunda Oltinko'l tuman bolalar-o'smirlar sport maktabida 34 nafar trener faoliyat olib bormoqda. SHundan 18 nafari oliy malumotli, 2 nafari tugallanmagan oliy malumotli bo'lsa, qolgan trenerlar o'rta-maxsus malumotga ega.

Sport maktabida 16 ta sport turi bo'yicha to'garaklarda jami 1227 nafar sportchi muntazam shug'ullanib kelishadi. Sport maktabida boks, futbol, gandbol, belbog'li kurash, o'zbek jang sanati, kikboksing va qo'l jangi sport turlarida eng ko'p sportchi yoshlar shug'ullanmoqda.

O'rganishlar natijasiga ko'ra, ishchi guruh Oltinko'l tumani BO'SMning bugungi faoliyatidan kelib chiqib, sport turlariga ixtisoslashuvi, moddiy-texnika bazasining holatini yanada rivojlantirish, sport inventarlari soni va bugungi holati, terma jamoa azolarini shakllantirish masalalari bo'yicha tuman sport bo'limi va BO'SM masullari bilan fikr almashishdi.

Ishchi guruhning Andijon viloyati bo'ylab safari davom etmoqda. Eslatib o'tamiz, yakunda viloyat sportining bugungi holatini o'rgangan holda, hududlardagi taklif va ehtiyojlardan kelib chiqib, ishchi guruh tomonidan Andijon viloyatida sportni yanada ommalashtirish va rivojlantirish bo'yicha maxsus dastur ishlab chiqiladi.