Jizzax belbog'li kurash bo'yicha Osiyo chempionatiga mezbonlik qiladi

Belbog'li kurash bo'yicha har yili o'tkazilayotgan jahon chempionatlari, xalqaro turnirlar belbog'li kurashni tobora rivojlanishiga xizmat qilayotgani bor gap. Yana bir yaxshi yangilik. 20-25 may kunlari Jizzax shahridagi "Urda" bog'idagi anfiteatrda ilk bor kattalar o'rtasida Belbog'li kurash bo'yicha Osiyo chempionati bo'lib o'tadi.

Birlashgan kurashlar olami (UWW), Osiyo belbog'li kurash konfedraciyasi, Jizzax viloyati hokimligi, Jizzax viloyati prokuraturasi, O'zbekiston Respublikasi Yoshlar siyosati va sport vazirligi, O'zbekiston belbog'li kurash federaciyasi hamda qator vazirlik va tashkilotlar hamkorligida o'tkazilayotgan ushbu Osiyo chempionatida, qitamizning eng nufuzli bellashuvlarida Hindiston, Eron, Indoniziya, Yaponiya qo'shni Qozog'iston, Qirg'iziston, Tojikiston, Turkmaniston kabi 20 ga yaqin davlatlarning nomdor polvonlari ishtirok etishi kutilmoqda. 

Birlashgan kurashlar olami (UWW) tasnifiga kiruvchi belbog'li kurash bo'yicha o'tkazildagan Osiyo chempionatida erkaklar -57,-62,-68,-75,-82,-90,-100  hamda +100  kg. vazn toifalarida kuch sinashishsa, ayollar -52,-58,-66,-76,+79 kg. vaznlarda bellashishadi. 

SHuningdek, musobaqa doirasida o'sha kunlari reglamentga muvofiq, Birlashgan kurashlar olami (UWW) tarkibidagi  Qozog'istonning "Qazaq Kuresi" va Qirg'izistonning "Alysh" kurash sport turlari bo'yicha ham Osiyo chempionati o'tkaziladi.  

Ayni paytda Jizzax viloyatida ushbu Osiyo chempionatini munosib tarzda o'tkazish uchun tayyorgarlik ishlari olib borilmoqda. Yangi nomlar, kuchli polvonlar Jizzax shaxridagi "Urda" bog'i arenasida aniqlanadi.

Ilhom RAHMONOV tayyorladi