Jizzaxda belbog'li kurash bo'yicha jahon chempionati o'tkaziladi

Mamlakatimiz jahonning eng sara polvonlarini kurash gilamiga chorlaydi. To'rt kun mobaynida dunyoning eng kuchli polvonlarini g'oliblik uchun bellashadi. Belbog'li kurash qoidalariga ko'ra, mazkur jahon chempionatida o'g'il bolalar belbog'li kurash va erkin yo'nalishlarida 52, 62, 68, 75, 82, 90, 100, +100 kg. vazn toifasida, qizlar belbog'li kurash va erkin yo'nalishlarda 48, 52, 58, 66, 76, +76 kg. vazn toifalarida  kuch sinashishadi. 

O'zbekiston Respublikasi  Prezidenti sovrini uchun Jahon chempionatida birinchi o'rinni qo'lga kiritgan sportchi 10 million so'm, ikkinchi o'rinni qo'lga kiritgan sportchi 7 million so'm va uchinchi o'rinni qo'lga kiritgan sportchi 5 million so'm pul mukofotiga ega bo'ladi.

Belbog'li kurash bo'yicha jahon chempionati O'zbekiston Respublikasi Turizm va sport vazirligi, O'zbekiston milliy olimpiya qo'mitasi, Jizzax viloyati hokimligi, Jahon belbog'li kurash associaciyasi (JBKA), Xalqaro belbog'li kurash federaciyasi (IBWA), O'zbekiston belbog'li kurash federaciyasi hamda qator vazirlik va tashkilotlar ko'magida o'tkaziladi. 

O'zbekiston Respublikasi Prezidenti sovrini uchun 2001-2003 yillarda tug'ilgan yigit-qizlar o'rtasidagi jahon chempionatida 30 dan ortiq davlatlardan terma jamoalarning tashrif buyurishi kutilmoqda.

Ayni paytda Jizzax shahrida jahon chempionati munosib tarzda o'tishi uchun qizg'in tayyorgarlik ishlari olib borilmoqda. 

Ilhom RAHMONOV tayyorladi