Kamonchilarimiz tarixda ilk bor mikst dasturida Osiyo chempionati sovrindoriga aylanishdi

"Bangladeshning Dakka shahrida bo'lib o'tgan 24-Osiyo chempionatida yurtimiz kamonchilari tarixiy yutuqqa erishib, yuqori professionallik, matonat va g'alabaga bo'lgan qatiyatini yorqin namoyon etdilar.

Aralash juftlik bahslarida Parij Olimpiadasi ishtirokchilari — Amirxon Sodiqov va Ziyoda Abdusattorova ajoyib natija qayd etdilar. Ular keskin kechgan yarim finalda amaldagi Parij-2024 Olimpiya chempionlari — Janubiy Koreya jamoasini mag'lub etib, O'zbekiston kamondan otish tarixida mislsiz sahifani ochdilar. Bu g'alaba jamoamizning dunyoning etakchi terma jamoalari bilan tengma-teng bellasha olishini isbotladi.

Final bahsida esa O'zbekiston dueti Xitoy Taypeyi terma jamoasi bilan kuch sinashib, 6:2 hisobida imkoniyatni boy berdi. SHunga qaramay, ular mamlakatimiz tarixida ilk bor aralash juftlik yo'nalishida Osiyo chempionatining kumush medaliga sazovor bo'ldilar.

Musobaqaning yana bir tarixiy onlari erkaklar terma jamoasiga nasib etdi — ular ilk bor bronza medalini qo'lga kiritdilar. Uchinchi o'rin uchun kechgan bahsda vakillarimiz qatiyat va ishonch bilan Qozog'iston jamoasini mag'lub etdilar", deyiladi federaciya xabarida.