Kannavaroning Kolumbiyaga qarshi jangchilari: Diasga qarshi 18 yoshli Karimov va markazdagi universallik

Bosh murabbiy Fabio Kannavaro Kolumbiyaga qarshi debyut uchrashuvi uchun boshlang'ich tarkibni elon qildi. Tarkibdagi tanlovlar italiyalik mutaxassisning raqib kuchini qanday baholayotgani va maydonda qanday taktikaga tayanajagidan darak bermoqda.

Quyida “oq bo'rilar” ning JCH tarixidagi ilk o'yin uchun tanlagan tarkibi, taktik yurishlari va kutilayotgan B planlarini tahlil qilamiz.

1. Darvozada barqarorlik: O'tkir Yusupovga ishonch sobit

Postda kutilganidek hech qanday kutilmagan o'zgarish yo'q. Terma jamoaning birinchi raqamli posboni O'tkir Yusupov yana startda. So'nggi yillardagi barqaror o'yinlari va xalqaro tajribasi bilan Yusupov murabbiylar shtabining mutlaq ishonchini qozonib bo'lgan. Kolumbiyaning tezkor va kuchli zarbalarga ega hujumchilariga qarshi bahsda O'tkirning seyvlari va himoyani boshqarishi biz uchun suv va havodek zarur.

2. Tarkibdagi eng katta syurpriz: Luis Diasga qarshi 18 yoshli Behruz Karimov!

Eng ko'p bahs va muhokamalarga sabab bo'lgan poziciya — o'ng qanot himoyasi bo'ldi. Kanada va Niderlandiyaga qarshi o'rtoqlik uchrashuvlarida Kannavaro bu chiziqda Farrux Sayfievni sinab ko'rgan, qolaversa, jarohatidan tuzalgan Hojiakbar Alijonovning safga qaytgani ham taxminlarni o'zgartirib yuborgan edi.

Biroq italiyalik mutaxassis kutilmagan va jasur qarorga qo'l urdi: o'ng qanot 18 yoshli Behruz Karimovga ishonib topshirildi! Bu juda katta tavakkal va shu bilan birga yosh iqtidorga ulkan ishonch. Siz bilan biz yaxshi bilamizki, Kolumbiyaning eng xavfli quroli — “Bavariya” yulduzi Luis Dias aynan shu qanotdan hamla qiladi. Karimov maydondagi barcha 90 daqiqa davomida tinim bilmay harakat qilishi, Diasga bo'sh hudud qoldirmasligi lozim. Bu yosh himoyachi uchun faoliyatidagi eng katta imtihon bo'ladi. Bu orqali u skautlar etiborini tortishi ham mumkin.

3. Markaziy himoya jumbog'ining echimi: Abdullaevning universalligi

Abduqodir Husanov va Rustam Ashurmatovning yonida uchinchi markaziy himoyachi kim bo'lishi ham JCH oldidan katta jumboq edi. Nomzodlar orasida Umar Eshmurodov va Jahongir O'rozov bor edi, ammo Kannavaro Abdulla Abdullaev variantida to'xtaldi.

Bu tanlov zamirida chuqur taktik mantiq yotibdi. Abdullaev nafaqat himoyada ishonchli, balki kerak bo'lgan vaziyatda maydon markaziga ko'tarilib, tayanch yarim himoyachisi rolini ham bajara oladi. Bu o'yin davomida taktikani 4-3-3 ga osongina transformaciya qilish imkonini beradi. Albatta, bu o'yindan kelib chiqib amalga oshiriladigan yurish hisoblanadi.

4. Markazdagi mustahkam “devor”: SHukurov va Mozgovoy

Tayanch zonasida Otabek SHukurovning yonida kim harakat qilishi muhim edi. Jarohatidan to'liq tiklanib ulgurmagan Odiljon Hamrobekov borasida murabbiylar shtabi tavakkal qilib o'tirmadi. Uning o'rniga Niderlandiya bilan bahsda o'zini ko'rsatgan, maydonda eng kam xatoga yo'l qo'yib, foydali harakat qilgan Akmal Mozgovoy asosiy tarkibga kiritildi. SHukurov-Mozgovoy tandemi kolumbiyaliklarning markazdagi bosimini qaytarishda asosiy kuch bo'ladi. Startda Mozgovoyning tushishi eng maqbul variant edi.

5. Hujum sehrgarlari va sof forvard

Hujum chizig'imiz esa maksimal darajada kreativ va xavfli ko'rinish olgan. Qanotlarda va hujum ortida raqib himoyachilarini dog'da qoldirishga qodir bo'lgan Oston O'runov hamda Abbosbek Fayzullaev harakat qiladi. Ularning tezkor reydlari va kutilmagan paslari markazda raqibni taqib qiluvchi sardorimiz — Eldor SHomurodovni golli vaziyatlar bilan taminlashi lozim. JCHda sof forvard sifatida Eldorning tajribasi bizga juda asqotadi.

6. Kannavaroning B plani: Zaxiradan kimlar o'yinni kuchaytira oladi?

Uchrashuv scenariysi o'zgargan taqdirda, O'zbekiston zaxira o'rindig'ida o'yinni tubdan burib yubora oladigan ijrochilar etarli:

• Qanotdagi muammolar uchun: Agar yosh Behruz Karimov qanotida Luis Diasga qarshi qiyinchiliklar yuzaga kelsa, Kannavaro darhol tajribali Farrux Sayfievni maydonga tashlashi mumkin.

• Hujumni kuchaytirish uchun: Ijodkorlik va standart vaziyatlar kerak bo'lganda Jamshid Iskanderov, qanotlardagi tezlik uchun Dostonbek Hamdamov va markazdagi jismoniy kurashlar hamda bosim uchun Igor Sergeev tayyor holatda turishibdi.

Xulosa: Fabio Kannavaro Kolumbiyaning jismoniy va texnik ustunligiga qarshi intizomli, taktik jihatdan qayishqoq va yoshlik shijoatiga yo'g'rilgan tarkibni maydonga tushirmoqda. Yigitlarga tarixiy debyutda omad tilaymiz! Olg'a, O'zbekiston!