Kasbida bel olish va uch kurash bo'yicha O'zbekiston chempionati o'tkazilmoqda + FOTO

O'zbekiston Respublikasi Turizm va sport vazirligi hamda O'zbekiston Bel olish va Uch kurash associaciyasining yillik-taqvim rejasidagi ushbu mamlakat chempionatida Qoraqalpog'iston Respublikasi, Toshkent shahri va barcha viloyatlardan 400 nafardan ortiq yosh polvonlar g'oliblik uchun kurash tushishmoqda.

Reglamentga muvofiq, dastlab Kasbi tumanidagi mazkur sport maktabining bayramona bezatilgan sport zalida tantanali ochilish marosimi tashkil etildi.

Marosimda Kasbi tuman hokimi To'xtamurod Meyliev, O'zbekiston Bel olish va Uch kurash associaciyasi bosh kotibi Nosir Azizov, Qashqadaryo viloyati hokimi o'rinbosari – Turizm va sport bosh boshqarmasi boshlig'i Azamat Avazov, tuman sektor rahbarlari ishtirok etib, sportchilarga samimiy tilaklar bildirishdi. SHundan so'ng musobaqaga start berildi.

Yosh polvonlar dastlab, Bel olishning chalish, xalqa-chalish, xalqa-chalishsiz hamda Uch kurashning yaktakli yo'nalishlarida belgilangan  vazn toifalariga ko'ra kuch sinashishdi. Bugunga qadar yuqorida takidlangan yo'nalishlar bo'yicha barcha vazn toifalarida g'olib va sovrindorlar nomi aniqlandi.

Mazkur bellashuvlarda asosan Qoraqalpog'iston Respublikasi, Sirdaryo, Qashqadaryo, Farg'ona viloyatlaridan kelgan sportchilarning chiqishlari muvaffaqiyatli bo'lmoqda. G'olib va sovrindorlar diplom, medal va esdalik sovg'alari bilan mukofotlanishdi.  

Takidlash joiz, ertaga 6 avgustdan Uch kurashning yaktaksiz va yaktaksiz-xalqa yo'nalishiga start beriladi. Bellashuvlar 9 avgustga qadar davom etadi.