Komil Yusupovni tabriklaymiz!

1957 yil 20 dekabrda Buxoro viloyati Qorakul tumanida tavallud topgan Komil Yusupov butun umrini milliy sport turimiz kurashni rivojiga bag'ishladi. 

Sambo va dzyudo bo'yicha o'nlab xalqaro turnirlar g'olibi, bir necha bor mamlakat chempioni, sobiq ittifoq terma jamoasi azosi, 1980 yilgi Moskva olimpiadasi qatnashchiligiga nomzod bo'lgan Komil Yusupov katta sport faoliyatidan so'ng, davlat idoralarida masul vazifalarda mehnat qildi.

Qator yillar mobaynida O'zbekiston dzyudo, kurash federaciyalari raisi, mamlakat yoshlar tashkiloti rahbari, Davlat jismoniy tarbiya va sport qo'mitasi raisi o'rinbosari, raisi vazifalarida ishladi.

1998-2014 yillari Xalqaro kurash associaciyasi prezidenti sifatida milliy splortimiz kurashning xalqaro maydondagi rivojiga beqiyos hissa qo'shdi.

2005-2006 yillari Lozannadagi “Olimpiya” muzeyida bir yillik kurash sporti ko'rgazmasini tashkil etish, kurash bo'yicha Turkiya, Hindiston, Vengriya, Ukraina, Dominikan Respublikasi, Braziliya, Franciya, Angliya, Janubiy Koreya, Greciya, Mangoliya, Rossiya kabi qator mamlakatlarda o'tgan jahon va qita chempionatlarini, xalqaro turnirlarni tashkil etish va o'tkazish ishlariga bosh-qosh bo'ldi. 

Milliy sportimiz kurashning Osiyo o'yinlariga va uning tizimidagi musobaqalar dasturidan o'rin olishda fidoyilik ko'rsatdi.

Komil Yusupovning mamlakatimiz va xalqimiz oldidagi alohida xizmatlari davlatimiz tomonidan munosib etirof etildi. 

O'z vaqtida “El-yurt” hurmati, “Sog'lom avlod uchun” ordenlari hamda O'zbekiston Respublikasida xizmat ko'rsatgan sportchi”, “Jismoniy tarbiya va sport alochisi”, “Mehnat faxriysi”  kabi  yuksak mukofotlarga sazovor bo'ldi. SHuningdek, xalqaro darajadagi “Yaxshi niyat elchisi”, “Buyuk CHingizxon” kabi medal va unvonlar bilan taqdirlandi. 

Bobomeros qadriyatlarimizning ajralmas sarchashmasi bo'lgan kurashning zamonaviy qonun-qoidalarini ishlab chiqqan, uning xalqaro sport terminalogiyasini yaratgan Komil Yusupovni bugungi tavallud ayyomi bilan muborakbod etamiz.

Jahon sport maydonlarida tili, dini, irqi boshqa-boshqa bo'lgan insonlarni birlashtirayotgan, do'stlashtirayotgan kurash jozibasi barchamizga abadul-abad g'urur bag'ishlashda davom etaversin.