Konkur bo'yicha Toshkent shahar ochiq chempionati bo'lib o'tdi FOTOREPORTAJ

Musobaqada mamlakatimizdagi mavjud ot sporti klublari, jamiyatlar va sport maktablarining 100 nafarga yaqin chavondozi o'z yo'nalishlaridagi bahslarda g'oliblik uchun kurashga kirishishdi.

Ochiq chempionat musobaqalarini eng kichik ishtirokchilar – 12-14 yoshli sportchilar 5-6 yoshli otlar bilan boshlab berishdi. Mazkur yosh toifasida 23 nafar ishtirokchi o'z otlari bilan 100 santimetr balandlikka o'rnatilgan to'siqlardan sakrash bahslarida qatnashishdi.

– Musobaqaning o'tkazilishidan ko'zlangan maqsad eng avvalo yoshlarni ot sporti bahslariga keng jalb etishga qaratilgandi. Qaysidir manoda bunga erishdik. Bellashuvlar bahona hududdagi mahalla yoshlari ham turnirga chorlandi. SHuningdek, chempionat sababli poytaxtimizdagi iqtidorli sportchilar ko'rikdan o'tkazildi. Konkur mashg'ulotlarida qatnashayotgan ko'plab o'smirlar uchun musobaqa haqiqiy bayram bo'ldi,–deydi ot sporti bo'yicha respublika oliy sport mahorati maktabi mutaxassisi Aloxon Azizov.

12-14 yoshli sportchilar o'rtasidagi bahslarda 1-o'rinni barcha to'siqlardan to'rt yarim daqiqaga yaqin vaqt ichida bexato sakrab o'tgan 13 yoshli Umar Dadaev “Bukmeker” laqabli oti bilan egalladi. 2-o'rin “Raport” laqabli otni boshqargan Firdavs Davronbekovga nasib qildi. Akbar SHaripov va “Kechmeker” “juft”ligi esa 3-o'rinni qo'lga kiritdi.

– Ot sportiga yoshligimdan qiziqaman. 2 yilga yaqin vaqtdan beri to'siqlardan sakrash mashg'ulotlarida qatnashib kelaman. Maktabimizda barcha sharoit yaratilgan. Birinchi musobaqamda g'olib chiqishni astoydil istagandim. Niyatimga erishdim. Kelajakda olimpiya o'yinlarida ishtirok etib, O'zbekiston bayrog'ini jahon maydonlarida hilpiratsam, orzuimga erishardim, – deydi musobaqa g'olibi Umar Dadaev.  

Ochiq chempionatning keyingi musobaqalari o'smirlar va kattalar o'rtasida tashkillashtirildi. Uchar tulporlarning haqiqiy parvozi ko'rinishida o'tgan chempionatda muxlislar avvaliga “To'rtqashqa”ni olqishlagan bo'lsa, keyin ”Jayron”ning shiddatiyu, “Qorabayir”dagi o'ziga xos harakatni qo'llab-quvvatlashdi.

Yakunda bo'lsa, Sergey Antonovich “Ckay”, Humoyun Abdullaev ”Kacyus”, Oqiljon Sobirjonov ”Afsser” laqabli otlari bilan sovrinli o'rinlarni qo'lga kiritishdi. Musobaqada g'olib va sovrindor bo'lganlar tashkilotchilar tomonidan munosib taqdirdlandi.

Suratlar muallifi - Alimurod MAMADAMINOV, o'z muxbirimiz, matn - T.Ro'ziev