Kudermetova ikki g'alaba evaziga The HSBC Championships asosiy to'riga yo'l oldi, Rahimova esa...

Kecha musobaqaning saralash bahslari o'tkazildi. Unda mamlakatimizning birinchi va uchinchi raqamli tennis malikalari Kamilla Rahimova hamda Polina Kudermetova ham o'z omadini sinab ko'rdi. Kudermetova saralashning 2 soatu 5 daqiqa davom etgan 1/2 final uchrashuvida avstraliyalik Pricilla Xonni 4/6, 6/4, 6/3 hisobida mag'lubiyatga uchratdi. Asosiy to'rga yo'llanma taqdim etgan va 2 soatu 1 daqiqa davomiylikka ega final bahsida esa rossiyalik Alina CHaraevadan uch set natijasiga ko'ra ustun keldi - 6/3, 4/6, 6/4.   

Taqqoslash uchun, Polina Kudermetova WTA reytingida 123, Pricilla Xon 143, Alina CHaraeva 130-o'rinni egallab turibdi. Bir kunning o'zida ikki g'alabaga erishgan Kudermetova nufuzli musobaqaning asosiy to'riga yo'llanmani qo'lga kiritdi. Endi u ertaga, 9 iyun kuni dunyoning 28-raketkasi, chexiyalik Mari Buzkovaga qarshi kortga chiqadi. 

Afsuski, mamlakatizning birinchi raketkasi Kamilla Rahimova saralashning final uchrashuvida mag'lubiyatga uchrab, musobaqadagi ishtirokini yakunladi. Dunyoning 89-raketkasi bo'lib turgan Kamilla roppa-rosa 70 daqiqa davom etgan 1/2 finalda WTA reytingida 214-pog'onadan joy olgan gruziyalik Ekaterina Gorgodzeni 6/2, 6/3 hisobida dog'da qoldirdi. Ammo saralashning final bahsida dunyoning 54-raketkasi, saralash turnirida birinchi raqam ostida tasniflangan germaniyalik Tatyana Mariyaga 4/6, 3/6 hisobida yutqazib qo'ydi.