Kurash bo'yicha 2024 yilning eng yaxshilari etirof etildi

Ota-bobolarimizdan meros ulmas qadriyatimizning sport turi maqomiga ko'tarilishi asnosida 2025 yilgi Islom birdamlik o'yinlari kabi nufuzli sport infratuzilmasidan joy olishida, dunyoning o'nlab mamlakatlarida turli xalqaro kurash musobaqalari va seminarlari tashkil etilishida O'zbekiston kurash federaciyasi mutaxassislari, murabbiylari, ekspertlarining alohida o'rni bo'lganligi bor gap.

Kuni kecha O'zbekiston kurash federaciyasi 2024 yil mobaynidaga xalqaro musobaqalar, turnirlar va chempionatlar sarhisobiga ko'ra, yilning eng yaxshilari ro'yxatini elon qildi.

Unga ko'ra, joriy yil Eron Islom Respublikasining Tehron shahrida o'tkazilgan Osiyo chempionatida, Qozog'istonning Ostona shahrida o'tgan Butun jahon ko'chmanchilar o'yinlarida, Jahon professionallar seriyasi xalqaro turnirida g'oliblikka erishgan Otabek Hasanov yil kurashchisi nomiga loyiq sazovor bo'lgan bo'lsa, faxriylar o'rtasidagi respublika turnirida, “Prokuror polvoni” musobaqasida, Mo'g'uliston davlatida faxriylar o'rtasida o'tkazilgan Jahon chempionatida g'oliblik shohsupasiga ko'tarilgan Ulug'bek Ismoilov yilning faxriy kurashchisi nomiga loyiq ko'rildi.

SHuningdek, qator turnirlar, chempionatlar g'olibi Hilola Ortiqboeva yil ayol kurashchisi, SHohmurod SHomurodov va Mubinabonu Karimova yilning umidli yosh kurashchilari sifatida etirof etildi.

Yilning eng yaxshi murabbiylari nomiga mamlakat terma jamoasi bosh murabbiyi Rizamat Soliev va shogirdlari O'zbekiston chempionatlari va kuboklarida,  jahon va qita chempionatlarida shoda-shoda medallarni qo'lga kiritgan mahoratli murabbiy Manzura Tursunova sazovor bo'ldi.

Malakali kurash hakamlari Gulmira Ismatova va Iskandar Muxammatov yil hakamlari sifatida talqin etilgan jarayonda, respublika chempionatlarini yuqori saviyada tashkil etganligi, mamlakatimizda birinchi kurash mahorat maktabi faoliyatini yo'lga qo'yganligi uchun Xorazm viloyati kurash federaciyasi yilning eng faol hududiy federaciyasi sifatida sharaflandi.