Kurash. Navoiyda O'zbekiston chempionati yakunlandi

Joriy yilgi sport mavsumini ochib bergan musobaqada barcha hududlardan 800dan ziyod polvonlar g'oliblik uchun bel olishdi.

Musobaqaning dastlabki kunida engil vazn, ikkinchi kunida esa o'rta vazn toifalarida g'oliblar aniqlangan bo'lsa, bugun og'ir vaznli kurashchilar orasida O'zbekiston chempionlari malum bo'ldi.

Ayollar o'rtasida 87 kg.gacha bo'lgan vazn toifasida xorazmlik Rahima Yo'ldosheva oltin medalga sazovor bo'ldi. U finalda samarqandlik Oybarchin Abdurashidovadan ustun keldi. Ushbu vazn toifasida bronza medallari mezbon sportchi Gulchehra Boboniyozova hamda Andijon viloyati vakilasi Gulasal Haydarovalarga nasib etdi.

Eng og'ir, yani 87 kg.dan yuqori vaznga ega kurashchi qizlar o'rtasida kechgan bellashuvlar ham murosasiz kechdi va ular orasida Surxondaryo viloyati vakili Rinata Ilmatovaga munosib raqib topilmadi. Finalda u Sohibjamol Xoliqulovani (Surxondaryo) mag'lub etdi. Beg'am Boyimova (Toshkent sh.) hamda Norsuluv Jumamuratovalarga (Qoraqalpog'iston) bronza medali nasib etdi.

Erkaklar o'rtasida 100 kg.gacha bo'lgan vazn toifasida Erkin Doniyorov (Buxoro) oltin medal bilan taqdirlandi. Finalda u Elbek Abdullaevdan (Jizzax) ustun chiqdi. Sardor SHovriqov (Qashqadaryo) hamda Dilshod CHorievlarga (Toshkent vil.) bronza medali nasib etdi.

Eng murosasiz bellashuvlar esa o'ta og'ir vazn toifasidagi kurashchilar o'rtasida kechdi. Ushbu vazn toifasida g'oliblikka davogarlar talaygina edi, ammo hech kim jahon chempioni va Osiyo o'yinlari g'olibi, surxondaryolik Muhsin Hisomiddinovning yana bir bora O'zbekiston chempionligini qo'lga kiritishiga xalal berolmadi. Hal qiluvchi bahsda u Pahlavon Mahmud izdoshi Boltaboy Boltaevni (Xorazm) mag'lubiyatga uchratdi. Samarqandlik Bekzod Karimov va Toshkent shahri vakili SHohruh Usmonovlar shohsupaning uchinchi pog'onasidan joy olishdi.

SHu tariqa keskin va murosasiz bellashuvlarga boy tarzda o'tgan kurash bo'yicha O'zbekiston chempionati ham yakuniga etdi. Musobaqa yakunida g'olib va sovrindorlar oltin, kumush, bronza medallari hamda O'zbekiston kurash federaciyasi tomonidan tasisetilgan esdalik sovg'alari bilan taqdirlanishdi.

Musobaqalar yakunida murabbiylarimiz mamlakat yoshlar va milliy terma jamoalariga nomzodlarni belgilab olishdi. Endi ular yil davomida tashkil etiladigan nufuzli xalqaro turnirlar, qolaversa noyabr oyida Janubiy Koreyaning CHengju shahrida o'tkaziladigan yoshlar va kattalar o'rtasidagi XII jahon chempionati hamda Gonkongda bo'ladigan Osiyo chempionatida vatanimiz sharafini himoya qilishadi.