Kurash: O'zbekiston kubogi mezbonlarga nasib etdi

Qizg'in va murosasiz kechgan bahslar yuqori saviyada va ko'tarinki ruhda bo'lib o'tdi. Unda Qoraqalpog'iston Respublikasi, barcha viloyatlar va Toshkent shahridan kelgan 300 nafarga yaqin alp yigitlar va barchinoy qizlar g'oliblik uchun o'zaro bel olishdi.

Murosasiz kechgan bahslar finaliga Samarqand va Buxoro viloyati jamoalari etib kelishdi. «O'z uyingda devorlar ham suyaydi», deganlaridek hal qiluvchi bahsda buxorolik polvonlar raqiblari bo'lmish Samarqand viloyati jamoasini aslo ayab o'tirmadi va 8:1 hisobida g'alaba qozonib, O'zbekiston kubogi sohibiga aylanishdi. Bu bilan ular qaysidir manoda o'tgan yilgi mag'lubiyat uchun revansh olishdi, desak ham xato qilmaymiz.

SHuningdek, musobaqa doirasida shaxsiy birinchilik bo'yicha ham bellashuvlar o'tkazilib, g'olib va sovrindorlar aniqlandi. Uch kun davom etgan murosasiz bellashuvlar yakuniga ko'ra, umumjamoa hisobida 1-o'rinni Buxoro viloyati jamoasi qo'lga kiritgan bo'lsa, shohsupaning ikkinchi pog'onasini Samarqand viloyati azolari band etishdi. Toshkent hamda Surxondaryo viloyatlari jamoalari esa 3-o'ringa loyiq ko'rildi.

Takidlash joiz, sport irodani toblash bilan bir qatorda millatlarni birlashtiradi va do'stlashtiradi. Insonni aniq maqsad sari intilishga undaydi, qiyinchiliklarni bardosh va chidam bilan engib o'tishga o'rgatib, g'alabaga ishonch, g'urur va iftixor, vatanparvarlik tuyg'ularini shakllantiradi. Milliy g'ururimiz bo'lmish kurashda ham ana shu fazilatlar mujassam va shunisi bilan u yanada qadrlidir.