Kurashchilar Bo'stonliqda tayyorgarlik ko'rishyapti FOTOREPORTAJ

- Taqvim rejasi bo'yicha 36 kunlik o'quv-yig'in mashg'ulotini “Ko'k suv” dam olish zonasida o'tkazmoqdamiz, - deydi maktab-internatining kurash bo'limi bosh murabbiyi Murod Do'simbetov. - Mashg'ulotlarda asosan o'quvchilarning jismoniy tayyorgarligini oshirishga urg'u berilayotir. Respublika ixtisoslashtirilgan olimpiya zaxiralari maktab-internati rahbariyati bolalarning ko'ngilli hordiq chiqarib, jismoniy jihatdan baquvvat bo'lishlari uchun barcha shart-sharoitlarni yaratib bergan.

SHuningdek, dam olish zonasida CHirchiq olimpiya zaxiralari maktab-internati, CHirchiq shahar bolalar-o'smirlar sport maktabi tarbiyalanuvchilari bilan birga turli musobaqalar, uchrashuvlar o'tkazilayotgani barchaga manzur bo'lmoqda.

Maktab-internat kurashchilari yaqinda Namangan viloyatida o'smirlar va qizlar o'rtasida sohil kurashi bo'yicha bo'lib o'tgan O'zbekiston chempionatida munosib ishtirok etishgan. Alihaydar Majidov (55 kg.), Ahror Ziyodullaev (73 kg.), Jamshid Abdujabborov (+100 kg.) lar g'oliblik shohsupasining eng yuqori pog'onasidan joy egallagan. 100 kg. vazn toifasida ishtirok etgan Asror Xolmamatov ushbu chempionatning bronza medaliga sazovor bo'lgan edi. Endi bu sportchilar Tailandda bo'lib o'tadigan Osiyo chempionatida vatanimiz sharafini munosib himoya etadi.

Joriy yilning avgust oyi oxirida Janubiy Koreyada kattalar o'rtasida Jahon chempionati bo'lib o'tishi rejalashtirilgan. Ushbu nufuzli turnirga Abror Jabborov (60 kg.), O'rol Sodiqov (81 kg.) va Umar Bozorov (81 kg.) lar astoydil tayyorlanishyapti. SHuningdek, kurashchilar joriy yilda Navoiy shahrida 2004-2005 yillarda tavallud topgan bolalar o'rtasida bo'lib o'tadigan mamlakat chempionati bahslariga ham qizg'in hozirlik ko'rishmoqda.

Suratlar muallifi - Alimurod Mamadaminov