Los-Anjeles-2028: Olimpiada yo'lida regbichi qizlarimizning imkoniyati yigitlarimizga qaraganda yuqori baholandi

Kecha O'zbekiston regbi federaciyasining bu boradagi rejalari ko'rib chiqildi.

Rasmiylar o'rganish ishlari davomida jamoaviy sport turlariga alohida ahamiyat qaratishmoqda. Bugun ham terma jamoalarning moddiy texnik bazasini yaxshilash, xorijlik mutaxassislarni jalb etish, selekciya ishlariga ahamiyat qaratish orqali natijadorlikni oshirish muhim yo'nalish sifatida belgilab olindi. 

Xususan, O'zbekiston Respublikasi Oliy Majlisi Senati raisining birinchi o'rinbosari, mamlakat regbi federaciyasi raisi Sodiq Safoev Toshkent viloyati yoki poytaxtimiz hududida terma jamoa yig'inlari uchun muqim bazani belgilab olish taklifini ilgari surdi.

Suhbatda federaciya mutasaddilari regbi-7 bo'yicha O'zbekiston ayollar terma jamoasining Los-Anjeles-2028 yozgi Olimpiya o'yinlariga yo'llanma olish imkoniyatlarini yuqori baholashdi. Taqdimotda buning uchun tuzib chiqilgan reja haqida batafsil malumot berildi. Xususan, uzluksiz o'quv-mashg'ulot yig'inlarini tashkil etish, terma jamoaning xalqaro musobaqalardagi ishtirokini taminlash, farmakologiya yo'nalishiga etibor qaratish muhim jihatlardan sanaladi.

Yig'ilish davomida federaciya mutasaddilarining mavzu yuzasidan fikrlari o'rganilib, O'zbekiston delegaciyasini bo'lajak Olimpiya o'yinlariga puxta tayyorlash bo'yicha ishlab chiqiladigan Prezident qarori loyihasi uchun takliflar belgilab olindi.