Marat Qurbonov: “Niyatimiz ulkan, lekin bashorat qilmayman”

Marat Qurbonov boshchiligidagi terma jamoa azolari 5-19 iyun kunlari Toshkent  viloyatining Yangiobod o'quv-mashg'ulot bazasida yig'in o'tkazib, undan so'ng besh kun davomida CHemyonda xordiq chiqardilar. Biz mashg'ulotlar yuzasidan terma jamoa bosh murabbiyiga murojaat qildik.

- Hammasi rejaga ko'ra davom etmoqda, - deydi M. Qurbonov. – Yangioboddagi ikki haftalik yig'inda umum jismoniy va funkcional tayyorgarlikka etibor qaratdik. Undan so'ng esa CHimyonda 10 nafar sportchimiz va murabbiylar shtabi birgalikda xordiq chiqarishdi. Hozirda sportchilarimizga qisqa tatil berdik. Ular o'z uylarida ota-onasi, yaqinlari davrasida.

- Keyingi yig'in qachon va qay yo'sinda tashkil etiladi?

- 1-18 iyul kunlari ikkinchi bosqich mashg'ulotlari yana Yangiobodda davom etadi. Bu safar texnika, taktika ustida ishlaymiz. SHuningdek, juftliklarda erkin bahslar ham tashkil etiladi. Yig'inda licenziya olgan  sportchilarimizga 40ga yaqin terma jamoa azolari yordam berishadi.

- Biroz muqaddam ayrim sportchilarimizda jarohatlar ham bor edi. Hozir bunday muammolar bartaraf etilganmi?

- Bokschilarimiz Ommaviy axborot vositalarida ketma-ket chiqishlar qilib, “teleyulduz” bo'la boshlaganidan so'ng shunday holatlar kuzatilgandi. Ko'z tegmasin, hozir hammasi joyiga tushmoqda. Bu kabi ko'ngilsizliklarni oldini olish uchun olimpiya o'yinlariga yopiq tarzda tayyorgarlik ko'ryapmiz (kulib). Agar hozir chetdan birontasi bokschilarimizni ko'rgani kelsa ham  xuddi chaqaloqni nazardan saqlagan singari yuzlariga qora kuya surtib, keyin ko'rsatyapmiz.

- Marat aka, Rioda nechta medal qo'lga kiritilishi kutilmoqda?

- “Prognoz”ni yomon ko'raman. Niyatlarimiz, albatta, katta. Aslida, hamma sportchilarimiz chempionlikka munosib. Buyog'iga Yaratgan omadimizni bersa  bo'ldi.

- “Rio-2016”da murabbiylar shtabidan kimlar o'rin oladi?

- Hozircha bu haqda aniq javob ayta olmayman. Bizga olimpiya qo'mitasidan 6ta joy ajaratilgan. Uch nafar rahbariyat, ikki murabbiy va bir shifokor uchun. Niyatimiz, imkon qadar sportchilarimizning shaxsiy murabbiylarini ham olipiadaga olib ketish.

- Braziliyaga qachon yo'l olmoqchisizlar?

- 20 iyulda Braziliyaga borib, u erda so'nggi tayyorgarlik bilan birga iqlimga moslashamiz. SHu bilan birga bokschilarimiz ham bu muddat davomida o'zlarini ancha erkin tuta boshlashadi. Bu sportchi uchun  juda ham muhim. 2 avgust kuni esa olimpiya shaharchasiga ko'chib o'tishni rejalashtirganmiz.

Malumot uchun, erkaklar o'rtasida Hasanboy Do'smatov (49 kg), SHahobiddin Zoirov (52 kg), Murodjon Ahmadaliev (56 kg), Hurshid  Tojiboev (60 kg), Fazliddin G'oipnazarov (64 kg), SHahram G'iyosov (69 kg), Bektemir Meliqo'ziev (75 kg), Elshod Rasulov (81 kg), Rustam To'laganov (91 kg), Bahodir Jalolov (+ 91 kg), xotin-qizlar o'rtasida esa Yodgoroy  Mirzaeva (51 kg) olimpiya o'yinlarida yurtimiz sharafini himoya qiladi.

Ulug'bek Hakimjonov suhbatlashdi, o'z muxbirimiz