Maykl Morales Maddalena yoki Maxachevga qarshi janglarga tayyor

Morales bahor oylarida ushbu vazn toifasida sobiq UFC chempioni, noyabr oyida Islam Maxachevga kamarini boy bergan Jek Della Maddalenaga qarshi jang o'tkazishi mumkinligini aytdi.

Avvalroq UFC Maxachevga yanvar oyida chempionlik kamarining birinchi himoyasini o'tkazishni taklif qilgandi. Ammo rossiyalik bundan bosh tortdi va aftidan, uning bu jangdagi raqibi hozircha mag'lubiyatsiz harakat qilayotgan Morales bo'lishi kerak edi.

"UFC menga mart yoki aprel oylarida Jek Della Maddalenaga qarshi ehtimoliy jang haqida xabar berdi, - dedi Morales ESPN Deportes nashriga bergan intervyusida. - O'ylashimcha, ular ham Maxachevga yanvarda men bilan jang qilishni taklif etishgan, biroq u rad etgan".

Islam Maxachevning o'zi Ramazon oyidan keyin UFC oktagoniga qaytishni rejalashtirmoqda, hozircha UFC navbatdagi chempionlikka davogar borasida sukut saqlayapti.

"Agar men Jek bilan jang qila olsam - bu tajriba orttirish uchun yana bir muhim qadam bo'lardi. Agar ular Maxachev bilan jang qilishni taklif etishsa, tabiiyki, men bunga bajonidil rozi bo'laman", - deya qo'shimcha qildi Morales.