Mirobodda sportsevar oilalar o'zaro musobaqalashdi

O'zbekiston Respublikasi Prezidentining 2020 yil 30 oktyabrdagi «Sog'lom turmush tarzini keng tatbiq etish va ommaviy sportni yanada rivojlantirish chora-tadbirlari to'g'risida»gi Farmonida Jismoniy tarbiya va sport vazirligiga bir qator manfaatdor vazirlik va idoralar bilan hamkorlikda aholi, xususan oilalar orasida sog'lom turmush tarzini keng targ'ib qilish maqsadida «Otam, onam va men – sportchilar oilasi!» sport musobaqalarini tashkil etish vazifasi ham yuklatilgan.

Farmon ijrosini taminlash maqsadida kecha Mirobod tuman xokimligi, tuman jismoniy tarbiya va sport bo'limi, Mahalla va oilani qo'llab-quvvatlash bo'limi bilan hamkorlikda Mirobod tumani 1-sonli bolalar-o'smirlar sport maktabida «Otam, onam va men – sportchilar oilasi» shiori ostida sport musobaqalarini tashkil qildi. Unda tumandagi «CHinor», «Yuksalish», «Yangi Qo'yliq» hamda «Ziyonur» mahallalarida istiqomat qiluvchi sportsevar oilalar o'zaro musobaqalashdi.

Qizg'in, murosasiz va eng muhimi, do'stona ruhda tashkil etilgan musobaqalar yakuniga ko'ra 1-o'rinni «Ziyonur» mahallasi nomidan qatnashgan Kamolovlar oilasi qo'lga kiritgan bo'lsa, 2-o'rin «Yuksalish» mahallasida yashovchi Umarovlar oilasiga nasib etdi. 3-o'rinni esa «CHinor» mahallasidan Akbarovlar oilasi egalladi.

Tadbir yakunida g'olib va sovrindorlar, shuningdek sport musobaqasi ishtirokchilari tashkilotchilar tomonidan diplom va esdalik sovg'alari bilan taqdirlanishdi.