MOQ prezidenti og'ir atletikachilarimizning onlayn mashg'ulotini kuzatdi

Polvonlarimizning imkoniyatlarini chamalash, texnik va taktik tayyorgarligini ko'zdan kechirish maqsadida onlayn mashg'ulot o'tkazildi. Mazkur jarayonni MOQ prezidenti Rustam SHoabdurahmonov hamda O'zbekiston og'ir atletika federaciyasi raisining birinchi o'rinbosari SHahrullo Mahmudov ZOOM platformasi orqali kuzatib borishdi. 

Suhbat chog'ida og'ir atletika bo'yicha keyingi hafta oxirida o'tkazilishi rejalashtirilayotgan xalqaro onlayn-musobaqaga tayyogarlik haqida so'z bordi. Rustam SHoabdurahmonov atletlarning mashg'ulot jarayonini kuzatar ekan, ularning jismoniy holatiga ijobiy baho berdi. 

SHuningdek, MOQ rahbari tomonidan ushbu sportning ommaviyligini oshirish, yoshlar orasida sog'lom turmush tarzini targ'ib qilish maqsadida og'ir atletikachilar ishtirokida onlayn-musobaqalar, turli onlayn uchrashuvlar va yosh havaskorlar uchun motivacion ruhdagi murojaatlar, master-klass, qiziqarli materiallar tayyorlash borasida ko'rsatmalar berildi. 

O'z navbatida, sportchilarga mashg'ulotlardan chalg'imaslik, zal va mehmonxonadan tashqari boshqa biror joyga bormaslik, bugungi muhim davrda ehtiyotkorlik choralari, karantin qoidalariga rioya qilish zarurligi yana bir bor eslatildi.