MOQda yana bir tahliliy-tanqidiy ruhdagi yig'ilish bo'lib o'tdi FOTOGALEREYA

MOQ prezidenti Rustam SHoabdurahmonov boshqargan yig'ilishda bir nechta muhim masalalar muhokama qilindi. Yig'ilishda yaqindagina MOQ vice-prezidenti lavozimiga tayinlangan Saken Polatov va Azizjon Kamilov, qator sport federaciyalari rahbarlari, sport faxriylari hamda OAV xodimlari ishtirok etdi.

Rustam SHoabdurahmonov o'z so'zida sport tibbiyotiga etibor qaratib, sportchilarni tibbiy ko'rikdan o'tkazish mexanizmiga alohida urg'u berdi. MOQ rahbari terma jamoaga nomzod sportchilarning ko'rikdan o'tkazish sarf-harajatlariga ko'maklashish, umuman ushbu jarayonga jiddiy etibor qaratish lozimligini aytdi. Avvalgidek bitta ko'z shifokoriga ko'rinish uchun MOQ qoshidagi Respublika sport tibbiyoti ilmiy-amaliy markaziga kelib o'tirish shart emasligi takidlandi.  

SHuningdek, SHoabdurahmonov talabalar sportiga ham atroflicha to'xtaldi va bu yo'nalishda islohotlar olib borilishini takidladi. Bugungi kunda sportchilarning kitob mutolaasiga befarqligi achchiq bo'lsada, haqiqat ekanligi aytildi. 

Bundan tashqari, Rustam SHoabdurahmonov faxriy sportchilar bilan ham muloqotga kirishdi. Ular bilan haftada ikki marta uchrashib, muloqot qilishga kelishib olindi. 

MOQ raisi OAV xodimlariga yuzlanib, sportda olib borilayotgan islohotlarni yoritishda ko'makchi bo'lishlari, ommaga faqat natijalarni aytish bilan kifoyalanmasdan, tahliliy ruhdagi materiallar, sportchilarning chempionlik shoxsupasigacha bosib o'tgan mashaqqatli yo'lni ko'rsatib berishlarini so'radi. 

Suratlar muallifi - Alimurod Mamadaminov