Mosvar Evloev - Aljameyn Sterling jangi o'tkazilmaydi

Bu haqda rossiyalik aralash yakkakurash ustasining o'zi ijtimoiy tarmoqdagi sahifasida xabar berdi. 

"Uzoq davom etgan gap-so'zlar, muzokaralardan keyin Sterling oktyabr oyidan oldin tayyor bo'lmasligini aytdi. Men shunchaki o'tirib, uni kuta olmayman. Iyul oyidayoq jang qilishga tayyorman. Kim o'zini meni mag'lub eta olishiga ishonsa, o'shanga qarshi oktagonga chiqaman. Nahotki "vyzov"ni qabul qiladigan hech kim yo'q?", - dedi Evloev.

Avvalroq, har ikkala jangchi ham og'zaki kelishuvga kelgandi. Lekin keyinroq amerikalik aralash yakkakurash ustasi jarohatini davolab olishi uchun vaqt kerakligini aytdi. Mag'lubiyat nimaligini bilmay kelayotgan Movsar shu yilning yanvar oyida britaniyalik Arnold Allenni mag'lubiyatga uchratgan edi. Bu uning UFC`dagi ketma-ket sakkizinchi g'alabasi bo'lgandi.  

Aljameyn Sterling esa shu yil aprel oyida yarimengil vazn toifasida debyut qildi. U Las-Vegasda o'tgan yubiley UFC 300 turnirida hamyurti Kelvin Kattarni hakamlarning yakdil qarori bilan taslim etdi. Ayni paytda Movsar Evloev UFC yarimengil vazn toifasi reytingining beshinchi, Aljameyn Sterling esa sakkizinchi pog'onasini band etgan.