Namangandagi namunali sport maktablaridan birining faoliyatiga nazar FOTOGALEREYA

O'zbekiston Respublikasi Jismoniy tarbiya va sport vazirligi tomonidan tuzilgan ishchi guruh Namangan viloyatida jismoniy tarbiya va sport sohasida aholi sog'lig'ini mustahkamlashga ko'maklashadigan aniq dasturlarni amaliyotga joriy etish, yoshlarni sportga keng jalb qilish va ular orasidan iqtidorli sportchilarni saralab olish, sport turlari bo'yicha yuqori natijalarni taminlaydigan mahoratli sportchilar bilan milliy terma jamoalarni shakllantirish va trenerlar uchun qo'shimcha shart-sharoitlar yaratish bo'yicha amalga oshirilayotgan ishlar bilan yaqindan tanishmoqda.

Ishchi guruh kecha viloyatning chekka tumanlaridan biri Norin tumanida bo'ldi. Etiborlisi, bu tuman Namangan viloyatidagi «yashil» hududlarga kiruvchi kam sonli tumanlardan biri bo'lib, ayni paytda yosh sportchilarning mashg'ulot olib borishlari uchun ruxsat berilgan.

Tumanda 1478 nafar sportchi yoshlarni o'zida qamrab oladigan Bolalar-o'smirlar sport maktabi faoliyat ko'rsatmoqda. Maktabda 41 nafar trener 20 ta sport turi bo'yicha yoshlarga engilmaslik sirlarini o'rgatishmoqda. Trenerlarning 14 nafari oliy malumotli, yana 7 nafar trener oliy o'quv yurtining maxsus sirtqi bo'limida tahsil olmoqda.

BO'SMda boks, erkin kurash va gandbol sport turlari alohida rivojlangan bo'lib, ayni paytda 628 ta sportchi yoshlar mashg'ulotlarda ishtirok etmoqda. Bu sport turlari bo'yicha bir nechta Jahon va Osiyo chempionlari hamda qator xalqaro musobaqalar g'oliblari etishib chiqqan.

Norin tumanida 164 mingga yaqin aholi istiqomat qilayotgan bo'lib, ushbu hudud boks, gandbol va yunon-rum kurashi sport turlariga ixtisoslashtirilmoqda. Tuman aholisining qariyib 37 mingi sport bilan qamrab olingan. 19 mingga yaqin aholi muntazam sport bilan shug'ullanmoqda. Ularga 250 dan ortiq sport inshootlari xizmat ko'rsatyapti.

Quyida Norin tumani Bolalar-o'smirlar sport maktabi faoliyatidan foto lavhalar etiboringizga havola etiladi: