22 jan 09:30
Yangiliklar
Navoiy viloyati hokimi sportchilarni qo'llab-quvvatlashga tayyorligini bildirdi
Avval xabar berganimizdek, Vazirlar Mahkamasining Sport va turizmni rivojlantirish masalalari kotibiyati Bosh mutaxassisi, Ishchi guruh rahbari Z.Tojiboev, Jismoniy tarbiya va sport vazirining o'rinbosari A.Karimov, MOQ raisi o'rinbosari SH.Tashmatovdan iborat guruh Prezidentimizning “O'zbekiston sportchilarini 2020 yil Tokio shahri (Yaponiya)da bo'lib o'tadigan XXXII yozgi Olimpiya va XVI Paralimpiya o'yinlariga tayyorlash to'g'risida”gi PQ–2821-sonli qarori hamda Vazirlar Mahkamasining 2020 yil 7 avgustdagi “O'zbekistonda 2025 yil yoshlar o'rtasida IV Osiyo o'yinlarini o'tkazishni tashkil etish to'g'risida”gi 468-son qarorlari ijrosini o'rganish yuzasidan shu kunlarda Navoiy viloyatida bo'lib turishibdi.
Ishchi guruh azolari Navoiy viloyati hokimi Qobul Tursunov qabulida bo'lishdi.
Uchrashuvda Navoiy viloyatida sportni yanada rivojlantirish bo'yicha qo'shimcha dasturlar ishlab chiqish, aholining jismoniy tarbiya va sport bilan shug'ullanishlari uchun barcha qulayliklarni yaratish, Tokio-2020 Olimpiya va Paralimpiya o'yinlariga tayyorlanayotgan navoiylik sportchilarni ijtimoiy va moddiy jihatdan qo'llab-quvvatlash, ularning xonadonlaridan xabar olish va muammolarini o'rganib borish kabi masalalar atroflicha muhokama qilindi.
Ushbu viloyat vakillaridan hozirda dzyudo, badiiy gimnastika, suzish, og'ir atletika, engil atletika kabi sport turlari bo'yicha Tokio Olimpiya va Paralimpiya o'yinlariga tayyorgarlik ko'rayotgan sportchilar mavjud. Navoiylik ikki nafar sportchimiz – suzish bo'yicha terma jamoa azosi Xurshid Tursunov hamda paraatletika bo'yicha Elbek Sultonovlar allaqachon to'rt yillikning eng nufuzli musobaqasiga yo'llanmalarni naqd qilishgan. Oldinda turgan Xanchjou-2022 Osiyo o'yinlari hamda Parij-2024 Olimpiya o'yinlariga mazkur sport turlari geografiyasini yanada kengaytirish, sportning barcha turlarini rivojlantirish, viloyatdan etishib chiqqan taniqli atletlar yordamida yoshlarni sportga yanada keng jalb qilish kabi mavzularda ham atroflicha fikr almashildi.
Uchrashuv yakunida Navoiy viloyati hokimi Qobul Beknazarovich o'zaro muloqotda ko'rilgan barcha masalalar bo'yicha hamkorlikni qo'llab-quvvatlash va rivojlantirish, viloyatda sport taraqqiyotini yangi bosqichga olib chiqish, Olimpiya o'yinlariga tayyorgarlik ko'rayotgan har bir atletga xayolini bo'lmasdan faqat mashg'ulotlar olib borishi uchun barcha sharoitlarni yaratib berishga tayyor ekanligini malum qildi.
Fikrlar