Navoiyda belbog'li kurash bo'yicha O'zbekiston chempionati o'tkazildi

Sport vazirligi hamda O'zbekiston belbog'li kurash federaciyasining taqvim-rejasidagi mazkur mamlakat birinchiligida 300 nafarga yaqin polvon belbog'li kurashning belbog'li kurash va erkin yo'nalishi bo'yicha bellashdi.

Reglamentga ko'ra, o'g'il bolalar musobaqaning birinchi va ikkinchi kunlari belbog'li kurash va belbog'li kurashning erkin yo'nalishi bo'yicha kuch sinashishgan bo'lishsa, uchinchi kuni qizlar o'rtasida erkin yo'nalish bo'yicha bellashuvlar o'tkazildi. 

O'g'il bolalar o'rtasida belbog'li kurashning erkin yo'nalishi bo'yicha o'tgan bahslarda 5 ta oltin, 4 ta kumush va 3 ta bronza medalni qo'lga kiritgan Navoiy viloyati polvonlari umumjamoa hisobida birinchi o'rinni egallashdi. Belbog'li kurashning belbog'li kurash yo'nalishidan kuch sinashgan o'g'il bolalar o'rtasida esa 3 ta oltin, 2 ta kumush va 4 ta bronza medali bilan Toshkent viloyati jamoasi birinchi bo'ldi. 

Musobaqaning so'nggi kuni qizlar o'rtasidagi musobaqada 3 ta oltin, 3 ta kumush, 6 ta bronza medaliga sazovor bo'lgan Namangan jamoasi umumjamoa hisobida birinchi o'rinni qo'lga kiritdi. 

SHuningdek, yuqori saviyada o'tgan musobaqaning birinchi kunida tantanali ochilish marosimi tashkil etildi. Marosimda so'z olgan O'zbekiston belbog'li kurash federaciyasi bosh kotibi Abduxalil Malikov va boshqalar sportchilarni qutlab, ularga musobaqada muvaffaqiyat qozonishlariga omad tiladi. 

G'olib va sovrindorlar diplom va medallar bilan taqdirlanishdi.

Ilhom RAHMONOV tayyorladi