Og'ir atletika bo'yicha Jahon chempionatining 1-kunidan FOTOREPORTAJ

Yunusobod tumanidagi "O'zbekiston" sport majmuasida og'ir atletika bo'yicha yoshlar o'rtasida jahon chempionatining ochilish marosimi bo'lib o'tdi.

Tadbirda O'zbekiston Respublikasi Bosh vaziri o'rinbosari, Turizm va sport vaziri Aziz Abduhakimov, Xalqaro og'ir atletika federaciyasi Bosh kotibi Muhammad Jalud, Qurilish vaziri va O'zbekiston og'ir atletika federaciyasi raisi Botir Zokirov, MOQ raisi Rustam SHoabdurahmonov va boshqa rasmiylar hamda mehmonlar ishtirok etdi.

Erkaklar o'rtasida -55 kg vazn toifasida yurtimiz sharafini iqtidorli atletlarimizdan Og'abek Nafasov himoya qildi. Kutilganidek, har ikki mashqda ham oltin medal uchun hamyurtimizga qozog'istonlik Ablay Auelxanov raqobatchi bo'ldi. 

Dast ko'tarish mashqi birinchi urinishda Og'abekdan omad yuz o'girdi va 104 kg tosh ikkinchi urinishdagina atletimizga bo'ysundi. Qozog'istonlik Ablay uchinchi urinishda 108 toshni ko'tardi va Nafasov 109 kg natija qayd etsagina, raqibini ortda qoldirishi mumkin edi. Biroq Og'abekning uchinchi urinishi (109 kg) ham hakamlar tomonidan inobatga olinmadi va Nafasov kumush bilan cheklanishga majbur bo'ldi.

Siltab ko'tarish mashqida dastlab 126, keyin 129 kg toshni ko'tarishni uddalagan Og'abek uchinchi imkoniyatidan oldinoq kamida kumush medalni naqd qilib qo'ydi. Qozog'istonlik atlet birinchi urinishdayoq 132 kg natija qayd etgach, ekvadorlik Zurita Valexo Xose (127 kg) kuchli uchlikni yakunlab bergani aniq bo'ldi. Oltin medal uchun kurashda esa omad yana mehmon sportchiga kulib boqdi. Hamyurtimizga 133 kg tosh bo'ysunmagan bo'lsa, Ablay takroriy (uchinchi) urinishda 140 kg toshni ko'tara oldi. 

SHu tariqa, Og'abek Nafasov terma jamoamizga dastlabki (3 ta kumush) medallarni taqdim etdi.   

Suratlar muallifi - Alimurod MAMADAMINOV, o'z muxbirimiz