Og'ir atletika bo'yicha Qoraqalpog'iston chempionati o'tkazildi

Musobaqada Beruniy tumani, Nukus va Taxiatosh shaharlaridan 100 dan ziyod sportchi 7 vazn toifasida o'zaro bahslashdi.

– Bu o'ziga xos saralash bellashuvlarida “Barkamol avlod” sport o'yinlari va mamlakat chempionatida ishtirok etadigan kuchli sportchilar tanlab olinadi, – deydi musobaqa bosh hakami Fozil O'razimbetov. – G'oliblar mart oyining oxirida CHirchiq shahrida o'tkaziladigan O'zbekiston chempionatida ishtirok etadi.

Og'ir toshlarni dast va siltab ko'tarish bo'yicha eng yaxshi natijani qo'lga kiritgan nukuslik Zuhra Uzoqbergenova, Sayyora Qaypnazarova, Jaziyra Matmuratova, Bozorgul Reyimbergenova, Muyassar Jamoladdinova, Malika Madatboeva, Beruniy tumanidan Dina Tojiboeva o'z vazn toifasida birinchi o'rinni egalladi.

O'smir yigitlar o'rtasida o'z vazn toifasida boshqalarga imkoniyat qoldirmagan og'ir atletikachilar taxiatoshlik Dalat O'tebrev, Quvonch Boymuratov, O'mirboy Mavlenov, SHahimardon Kemalov, nukuslik Aybergen Ayapbergenov, Bekzod Jamolov, Muhammaddin Muratboev, Nurabulla Abdullaev g'oliblik shohsupasidan o'rin oldi.

G'oliblarga medallar va O'zbekiston chempionatiga yo'llanma topshirildi.


Aminboy Ortiqboev, O'zA