Og'ir atletika. CHempionlar tantanali kutib olindi + FOTO

SHu munosabat bilan Islom Karimov nomidagi Toshkent xalqaro aeroportda 17 yoshgacha bo'lganlar o'rtasidagi dunyo birinchiligida 4 ta oltin, 4 ta kumush va 3 ta bronza medallarini qo'lga kiritgan shijoatli sportchilarimiz tantanali kutib olindi.

Kutib olish marosimida O'zbekiston og'ir atletika federaciyasi mutasaddilari, murabbiylar, g'olib sportchilarimizning ota-onalari, keng jamoatchilik vakillari, jurnalistlar ishtirok etishdi.

–G'olib sportchilarimizni kutib olish uchun Namangan viloyati, Yangiqo'rg'on tumanidan keldik. Farzandim Diyorbek Ermatov 15 yosh bo'lishiga qaramasdan o'zidan ikki yosh kattalar o'rtasida oltin medalni qo'lga kiritib, jahon chempioni nomiga sazovor bo'lganligi barchamizni behad xursand qildi. Birinchi murabbiyi Abror Tojimirzaevning mashg'ulotlariga ilk marta olib borganimda 10 yoshli bolakay edi Diyorbek. SHukr, orzularimiz ushalmoqda. 

Dilbandlarimizning bunday muvaffaqiyatga erishishi mamlakatimizda sportga, yoshlar tarbiyasiga berilayotgan etiborning hosilasi, deb bilaman. Yosh sportchilarimizga jahon yo'llarini ochib berayotgan, ularning xalqaro musobaqalarda zafar quchishi yo'lida mehnat qilayotgan murabbiylariga minnatdorlik bildiraman, –-deydi chempionning otasi Dilshod Bulturov.

–Qashqadaryodan keldik. SHogirdim Qurbonmurod Nomozovning jahon chempionatida uchta oltin medalga sazovor bo'lgani mehnatlarimiz besamar ketmayotganligini ko'rsatdi. Qurbonmurod asli Samarqandning Jom qishlog'i, Omondara mahallasidan. Polvonlar avlodidan. Hali ko'rasiz, yaqin kelajakda u olimpiya chempioni ham bo'ladi. 

Arab davlatida g'ururimizni yuksaltirgan sportchilarni kutib olish uchun Omondaradan ham sportchimizning ota-onasi, do'stlari, mahalladoshlari kelishdi. Ertaga Jomu Qarshida uning g'alabasi sharafiga katta xursandchiliklar boshlanib ketadi. Etiborli jihati, aynan Jiddada zafar quchgan yoshlarimiz yaqin kelajakda O'zbekiston terma jamoasining asosini tashkil etadi. 

SHu boisdan yurtimizda sportga, xususan, og'ir atletika federaciyasida navqiron avlod vakillarining xalqaro musobaqalarda ishtirokiga alohida etibor berilayotganligi tahsinga sazovor, – deydi Qarshi olimpiya zaxiralari kollejining og'ir atletika bo'yicha murabbiyi Toir Parmonov.

Jahon chempionatida yurt bayrog'ini yuksaltirgan, chempionlik shohsupasiga ko'tarilgan yosh sportchilarimizga, ularning murabbiylariga gullar taqdim etildi.

T. Ro'ziev, YO. Meliboev (surat), O'zA