Og'ir atletika: Jahon chempionati sovrindori munosib kutib olindi

Jahon chempionati sovrindorini Namangan viloyati hokimi Xayrullo Bozorov hamda viloyat jismoniy tarbiya va sport boshqarmasi boshlig'i SHokirjon Qoraboev kutib oldi va Tokio-2020 Olimpiadasi oltin medallari yo'lidagi navbatdagi qadam bilan qutladi.

Xayrullo Bozorov, sportchini jahon chempionatida erishgan natijasi bilan qutlar ekan, Namangan viloyatining Adhamjonga ishonchi katta ekanini qayd etdi. Adhamjon Ergashevga viloyat hokimining pul mukofoti ham topshirildi.

Jahon chempionatida 67 kg vaznda ishtirok etgan o'smirlar va yoshlar o'rtasida ko'p karra jahon chempioni, yangiqo'rg'onlik atlet Adhamjon Ergashev dast ko'tarishda 146 kg natija bilan to'rtinchi o'rinni egallagan bo'lsa, siltab ko'tarishda 182 kg natija ko'rsatib, uchinchi o'rinni qo'lga kiritdi. Adhamjon, bronza medali bilan birga Tokio Olimpiadasi yo'llanmasi uchun qimmatli ochkolarni ham qo'lga kiritdi.

Adhamjon Ergashev Tailandda bo'lib o'tgan musobaqada ko'rsatgan natijasi bilan kattalar o'rtasida jahon chempionati sovrindori bo'lish bilan birga, o'z yosh toifasida 7 ta jahon rekordini ham yangiladi.

“Olimpiadada g'oliblikni qo'lga kiritish juda katta natija bo'ladi. Xalqaro maydonda O'zbekiston bayrog'i yuqori ko'tariladi. Bundan tashqari, minglab yoshlarimizda havas uyg'onadi, sportga kirib kelishadi, chempionlar ortidan ergashishadi” deb takidladi viloyat hokimi.

Adhamjon Ergashev Tokiodan Olimpiada oltin medali bilan qaytib, o'ziga bildirilayotgan ishonch va umidlarni to'la oqlash niyatida ekanligini aytib, minnatdorchilik bildirdi.