Og'ir atletika. Kumushxondan 3 ta oltin

Musobaqaning ikkinchi kuni erkaklar o'rtasida -67 kg vaznda g'olib va sovrindorlar nomini aniqlashdan boshlandi. Pokistonlik Talib Talha dast ko'tarishda 142 kg, siltab ko'tarishda 162 kg, ikki kurash yakuniga ko'ra 304 kg og'irlikni o'ziga bo'ysindirib shohsupaning yuqori pog'onasidan joy oldi. Turkiya sharafini himoya qilayotgan Hardal Ferdi ikki kurashda 286 kg: dast ko'tarish 126 kg, siltab ko'tarishda 160 kg o'g'irlikni qiyinchiliksiz ko'tarib ikkinchi o'rinni band etgan bo'lsa, kuchli uchlikka Liviya vakili, dast ko'tarishda 112 kg, siltab ko'tarishda 145 kg, umumiy 257 kg tosh ko'targan SHabi Ahsan yakun yasadi. Ushbu vazndagi terma jamoamiz azosi Nurdiyor Abduhalilov esa 111+144=255 kg bilan to'rtinchi o'rin bilan kifoyalandi.

Navbatdagi bahslar ayollar o'rtasida 64 kg va 71 kg vazn toifalarida bo'lib o'tdi. -64 kg vaznda 1-o'rin Turkiya vakilasi (91+118=209 kg) bilan Altun Berfinga nasib etdi. Dast ko'tarishda 95 kg, siltab ko'tarishda 113, ikki kurashda 208 kg bilan ruminiyalik Olaru Ralusa Andrea kumush medalni egalladi. Hamyurtimiz Fotima Habibullaeva dast ko'tarishda 74 kg, siltab ko'tarishda 90 kg, umumiy 164 kg og'irlik bilan "til topishib" bronza medallari bilan taqdirlandi.

71 kg vaznda terma jamoamizning asosiy medallarini jahon rekordchisi Kumushxon Fayzullaeva taqdim etdi. U dast ko'tarishda 99 kg, siltab ko'tarishda 124 kg, ikki kurash so'ngida 223 kg og'irlikni qiyinchiliksiz ko'tarib, terma jamoamiz hisobiga 3 ta oltin medalni yozib qo'ydi.

Kumush medallarni esa, yana bir vakilamiz, iqtidorli Nigora Suvonova (89+110=119 kg) egallagan bo'lsa, bronza medallarga 78+98=176 kg tosh ko'targan Ukraina jamoasi azosi Krychuk Alina munosib deb topildi.

Biz musobaqadan so'ng Jahon chempionatida g'olib bo'lgan o'zbekistonlik ilk ayol og'ir atletikachi sifatida tarixga o'z nomini yozishga ulgurgan Kumushxonning fikrlari bilan qiziqdik:

"O'z yurtimda yana bir bor g'olib bo'lganimdan xursandman. Biz murabbiylarimiz bilan birga yil boshidan buyon ushbu musobaqaga tayyorgarlik ko'rdik va amalda mashg'ulotlarimiz o'zini oqladi. Bugungi kunda sportchilar mashg'ulotlarni alo darajada olib borishlari uchun barcha sharoitlar yaratilgan. Buning uchun birinchi navbatda Prezidentimizga minnatdorchilik bildiraman. Keyingi chempionatlarda ham Tokio uchun qimmatli reyting ochkolarni yig'ish va licenziya qo'lga kiritish uchun bor kuchim bilan harakat qilaman. Xudo xohlasa, Olimpiada licenziyasini egallab, Yaponiyada ham Vatanimiz bayrog'ini yuqori ko'tarish maqsad qilib qo'yganman. Meni qo'llab-quvvatlab turgan barcha insonlarga alohida rahmat aytaman",- dedi chempionimiz Kumushxon Fayzullaeva.

Sarvinoz Raxmonqulova tayyorladi

Foto: Milliy olimpiya qo'mitasi matbuot xizmati