Og'ir atletika. Og'abek Nafasov birinchi bo'lib "jangga" kiradi

Biznikilardan birinchi bo'lib bugun, 9 mart kuni Og'abek Nafasov supachaga chiqadi. Mahalliy vaqt bilan soat 11:00da (O'zbekistonda yangi kun kirib kelgan pallada: Toshkent va Las-Vegas orasidagi farq -13 soat) 55 kilogrammgacha  vazn toifasidagi atletlar bahs boshlashadi.

Jami 13 sportchi o'z omadini sinab ko'radi. AQSH va Meksika termalari ikkitadan vakil bilan qatnashadi. Og'abekning raqiblari orasida mezbonlar va ularning eng yaqin qo'shnilaridan tashqari Turkiya, Turkmaniston va Italiya jamoasi azolarini sanab o'tish mumkin.

10 mart kuni 11:00 da qizlar -49 kgvazn toifasida musobaqaga kirishadi. Sovrindorlar safida Nigora Abdullaeva ham bo'ladi deb umid qilamiz.

11 mart kuni 12:00 da Asadbek Narimonov (-73 kg)medallar sari yurishni boshlaydi.

Rosa bir sutkadan so'ng chempionlikka asosiy davogarimiz Kumushxon Fayzullaevaning (-64 kg) navbati etadi.

12 mart kuni 17:00 da Nigora Suvonovaning (-71 kg) xalqaro sport arenasidagi debyutiga guvoh bo'lamiz.

13 mart soat 14:00 dan Tursunoy Jabborovaning (-81 kg) har bir urinishi g'alaba sari etaklashini kutamiz.

O'sha kuni kechqurun Mirhosil Mirzaboev (-96 kg) supachaga ko'tarilib, nimalarga qodir ekanligini namoyish etadi.

8 mart kuni deyarli barcha sportchilarimiz SHahrillo Mahmudov, Jo'ra Zoirov va Akobir Usmonov rahbarligida astoydil shug'ullanishdi. Faqat Og'abek Nafasov alohida reja asosida ertangi musobaqaga tayyorgarlik ko'rdi.

Vatandoshlarimiz o'zlariga bildirilgan ishonchni oqlashadi degan umiddamiz va ularga omad yor bo'lishini tilaymiz!

Mirzahakim To'xtamirzaev,

Las-Vegas, AQSH