Og'ir atletika. O'z uyingda devorlar ham suyaydi yoxud Xivada o'tgan musobaqada mezbonlar tengsiz!

Xiva shahridagi Milliy va Olimpiya sport turlariga ixtisoslashtirilgan maktab-internatda 4 kun davom etgan musobaqada jami 193 nafar o'smir va qizlar g'oliblik uchun supachaga chiqishdi. SHundan 116 nafarini o'smirlar, 77 nafarini esa qizlar tashkil qildi. Ishtirokchilar ham o'smirlar, ham qizlar o'rtasida 10 tadan vazn toifasida musobaqalashdi.

CHempionatda mezbonlar to'liq tarkib bilan qatnashdi (10 nafardan o'smir va qiz). Namangan va Buxoro viloyatlarining esa qizlari to'liq tarkibi bilan ishtirok etgan bo'lsa, o'smirlardan Qoraqalpog'iston Respublikasi va Samarqand viloyatidan 10 nafar sportchi supachaga ko'tarildi.

Medallar jamg'arishda kutilganidek mezbon Xorazm viloyati vakillari jami 11ta medal (4ta oltin, 4ta kumush, 3ta bronza) bilan 1-o'rinni egallashdi. 2-o'rinni umumiy 7ta medal (4-1-2) bilan Andijon viloyati sportchilari band etishgan bo'lsa, kuchli uchlikni 5ta medal (3-2-0) bilan Buxoro viloyati sportchilari yakunlab berishdi.

Kecha esa Xivada kattalar o'rtasidagi O'zbekiston chempionati boshlab yuborildi.