Og'ir atletika. “O'zbekiston Respublikasi mustaqilligi kubogi” onlayn xalqaro turnirining ochilish marosimi bo'lib o'tdi

Unda dunyoning 32 mamlakatidan 150 nafarga yaqin mahoratli atletlar o'z omadini sinab ko'rish istagini bildirishdi.

Og'ir atletika O'zbekistonda keng ommalashayotgan  sport turlaridan biri sanaladi. Ayni paytda mamlakatimizda og'ir atletika bilan 8 500 nafar yurtdoshimiz muntazam shug'ullanib kelmoqda.

Trenerlarning umumiy soni 264 nafar bo'lib, og'ir atletika sportiga ixtisoslashgan inshootlar soni 120 tani tashkil etadi.

SHuni alohida takidlash joiz, o'zbekistonlik sport ustalari og'ir atletika bo'yicha muntazam qita va jahon chempionatlari, Osiyo va Olimpiya o'yinlarida munosib ishtirok etib kelishmoqda.

Olimpiya o'yinlari g'olibi Ruslan Nuriddinov, kattalar va o'smirlar o'rtasida jahon chempionlari Akbar Jo'raev, Nigora Abdullaeva, ko'plab nufuzli musobaqalar sovrindori Adhamjon Ergashev, III o'smirlar yozgi Olimpiya o'yinlari sovrindori Dolera Davronova, Osiyo va jahon chempionatlari sovrindori Farhod Sobirov kabi sportchilarimizni bugun butun dunyoda yaxshi tanishadi.

Quvonarlisi, O'zbekiston terma jamoasi umidli yoshlar bilan Tokio-2020 yozgi Olimpiya o'yinlariga to'rtta yo'llanmani qo'lga kiritishga juda yaqin turibdi. Bu esa yurtimizda og'ir atletika sporti yaxshi rivojlangani hamda o'z ananalariga ega ekanligidan darak beradi.

Bugun CHirchiq shahrida joylashgan O'zbekiston davlat jismoniy tarbiya va sport universiteti manejida mazkur turnirning ochilish marosimi o'tkazildi. Unda Jismoniy tarbiya va sport vazirining birinchi o'rinbosari Ravshan Ermatov, O'zbekiston Milliy Olimpiya qo'mitasi bosh kotibi Oybek Qosimov, O'zbekiston og'ir atletika federaciyasi raisining o'rinbosari SHaxrullo Mahmudov, sportchilar, trenerlar hamda OAV xodimlari ishtirok etdi.

Tadbirda so'zga chiqqan Ravshan Sayfiddinovich bugungi murakkab sharoitda yurtimizda og'ir atletika bo'yicha “O'zbekiston Respublikasi mustaqilligi kubogi” onlayn xalqaro turniri o'tkazilayotgani, unda Olimpiada va jahon chempionlari Zulfiya CHinshanlo (Qozog'iston), Luis Moskera (Kolumbiya), Li Venven (Xitoy) kabi nomdor sportchilar ham o'z omadini sinab ko'rayotgani, bu esa musobaqaga bo'lgan qiziqish yuqori ekanligidan darak berishini takidlab, barcha ishtirokchilarga omad tiladi.

SHundan so'ng bugungi bellashuvlar davom ettirildi. Erkaklar o'rtasida -67 kg vazn toifasida o'tkazilgan musobaqada Vatanimiz sharafini Adhamjon Ergashev himoya qildi. U dast ko'tarishda 147 kg, siltab ko'tarishda esa 183 kg natija ko'rsatib, onlayn Xalqaro turnir g'olibligini qo'lga kiritdi.

Musobaqa ertaga yakunlanadi.