O'ldirish bilan tahdid qilgan UFC chempioni Jon Jons hibsga olindi

Policiya Jonsni antidoping agentligi vakilini o'ldirish bilan qo'rqitganlikda ayblayapti. Drug Free Sport International tashkiloti xodimasi Kristal Martines Jonsga shunday ayblov qo'ymoqda. Uning aytishicha, tekshiruv guruhi 30 mart kuni tongi soat 4 da Jonning uyiga borganda, u kuchli alkogol tasirida, yani mast holatda bo'lgan. Jons o'ldirish bilan tahdid qilishdan tashqari tekshiruvchining mobil telefonini ham olib qo'ygan.

SHu bilan birga Martines o'zi bilan birga bo'lgan xodim policiyaga murojaat etmasligini aytganini ham qo'shimcha qilmoqda. 2024 yilning boshidan beri UFC jangchilarini doping tekshiruvdan o'tkazayotgan tashkilot rahbari Jonsning uyiga borgan xodimlardan UFC rahbari bilan gaplashib olmaguniga qadar jangchiga ayblov qo'ymaslikni so'ragan. Lekin ayol tekshiruvchi policiyaga murojaat qilgan. 

O'z o'rnida Jon Jons tekshiruvchilar kelgan paytda haqiqatan ham mast holatda bo'lganini tan olgan. Ammo o'lim bilan tahdid qilganini inkor etgan va hatto hovli kamerasiga muhrlangan videoni ham policiyaga taqdim etgan. Videoda tekshiruvchilar va chempion do'stona ruhda xayrlashayotgani aks etgan.