Olimpiada medaliga sazovor bo'lgan Ivan Efremovga hukumat tomonidan mukofot beriladimi? Ushbu savolga javob berildi

U 2012 yilgi Olimpiya o'yinlarida beshinchi o'rinni egallagandi. Ammo, o'sha o'yinlarda uchinchi va to'rtinchi o'rinni band etgan sportchilarning tahlilidan taqiqlangan moddalar topilgandi. SHu sababli, bronza medali hamyurtimiz Ivan Efremovga nasib qildi.

Bugun Toshkentda o'tkazilgan tadbir davomida Efremovga Olimpiada medali tantanali tarzda topshirildi.

Malumki, O'zbekiston hukumati Olimpiya o'yinlarida sovrindor bo'lgan sportchilarni pul mukofoti bilan taqdirlaydi. Demak, qoida bo'yicha Efremov ham taqdirlanishi lozim.

Tadbir davomida OAV xodimlari ushbu masala yuzasidan savol bilan murojaat qilishdi. Savolga MOQ raisining birinchi o'rinbosari Ravshan Ermatov javob berdi:

"Ushbu yangilik juda tezda sodir bo'ldi. Olimpiada medallari ham yaqindagina etib keldi. Biz bu borada hukumatga murojaat qildik. Yaxshi bilasiz, O'zbekistonda Olimpiadada sovrindor bo'lgan sportchi etiborsiz qolmaydi. Ivan Efremov albatta taqdirlanadi", - dedi Ravshan Ermatov.