Olimpiya va Osiyo o'yinlari sovrindorlari bilan mashhur sport maktabi faoliyati o'rganildi

O'zbekiston Respublikasi Jismoniy tarbiya va sport vazirligi Ishchi guruhi Namangan shahrida joylashgan Yakka kurash sport turlariga ixtisoslashtirilgan bolalar-o'smirlar sport maktabining ayni damdagi holati bilan yaqindan tanishishdi.

To'rtta yirik bazaga ega bo'lgan sport maktabi qoshidagi sport inshootlarida bir kunda 2 mingdan ziyod aholi turli sport turlari bo'yicha mashg'ulotlarda band bo'lishadi.

2016 yilda Namangan shahar YAKSTIBO'SMga aylantirilgan ushbu muassasada 15 sport turi bo'yicha jami 80 nafar trenerlar 762 nafar sportchi yoshlarga kelajakda har bir musobaqalarda yuqori natijalarga erishishi yo'lida saboq berib kelyapti.

Etiborlisi, ushbu sport maktabida Namangan viloyatida yagona bo'lgan zamonaviy velotrek bazasi mavjud. Hozirda 4 nafar trener velosportning ommalashuvi yo'lida xizmat ko'rsatayapti. 40 nafardan ortiq yoshlar ushbu sport turi bilan professional darajada shug'ullanmoqda.

Ushbu sport maktabidan jahonga mashhur sportchilardan Olimpiya o'yinlari va jahon chempionatlari sovrindori Rustam Assakalov, yoshlar o'rtasida Jahon va Osiyo chempioni Adham Ergashev, Osiyo o'yinlari sovrindorlari Bahriniso Boboeva va Muxlisa Abdumalikovalar etishib chiqqan.

Bundan tashqari yosh sportchilar o'rtasida qator xalqaro musobaqalar g'oliblari tarbiyalanmoqda. Ushbu sport maktabidan hozirda 66 nafar iqtidorli sportchilar Milliy terma jamoalarimiz azolari sanalishadi.