Osiyo chempionatining ikkinchi kunida ham 12 ta medalga ega chiqdik

Musobaqaning ikkinchi kunida ham polvonlar yana sakkiz vazn toifasida g'oliblik uchun gilamga tushdi.

Osiyo chempionati vakillarimiz uchun omadli keldi. Musobaqaning ikkinchi kungi bahslarida SHuhrat Arslonov boshchiligidagi terma jamoamiz azolari 12 medalni qo'lga kiritdi. SHundan teng yarmini oltin medallar tashkil qildi.

Yosh polvonlarimizdan Hasan Botirov (-55 kg), Sanjar Saidqulov (-60 kg), Sardorbek Jangeldiev (-66 kg) hamda Jaloliddin Boynazarov (-73 kg), qizlar o'rtasida esa Malikaxon Qahharova (-70 kg) va mutlaq vaznda Rinata Ilmatovalar shohsupaning eng yuqori pog'onasiga ko'tarilgan bo'lsa, Ilhom Farmonov (-55 kg), Mengdona CHorieva (-63 kg), Sadoqat To'raeva (-70 kg) hamda SHohista Anorovalar (-78 kg) kumush medal bilan taqdirlandi.

Yana ikki nafar kurashchimiz Pahlavon Mansurov (-73 kg) hamda SHahnozaxon Bozorova (-63 kg) bronza medaliga sazovor bo'ldi.

Faqat ikkita vaznda oltin medallar o'zga yurt sportchilariga nasib etdi. Vetnamlik Nguen Ti Ngos (-63 kg) hamda Xitoy Taypeyi terma jamoasi azosi Yang Li-May (-78 kg) yoshlar o'rtasida Osiyo chempionligini qo'lga kiritdi.

SHunday qilib, 16 ta vazn toifasida o'tkazilgan musobaqada jami 24 ta (12 ta oltin, 10 ta kumush va 2 ta bronza) medalni qo'lga kiritgan polvonlarimiz umumjamoa hisobidan birinchi o'rinni egallashdi. Keyingi o'rinlarni esa Xitoy Taypeyi va Vetnam jamoalari band etishdi.

Ushbu musobaqada ishtirok etgan terma jamoamiz azolari 25 iyun kuni yurtimizga qaytib kelishadi.