O'tmishga nazar. Qo'rqinchli Quriya, ekranda ko'rsatilmagan birinchi bo'lim va hujumkor futbol sog'inchi

"Toshkent haqiqati" gazetasining o'sha vaqtdagi sonlarini varaqlar ekanmiz, bugungi kun muxlisi uchun qiziq va yaqin o'tmishga chorlaydigan voqealarga guvoh bo'lamiz.

Bugun futbolni eng yuqori sifatda, turli rakurslardan kuzatishga odatlanganmiz. Ammo gazeta sahifalaridagi maqolalar bizni butunlay boshqa – futbol translyaciyalari va xabarlari o'zgacha koloritga ega bo'lgan davrga qaytaradi.

"Quriya" – 90-yillar terminologiyasi

Eng avvalo, gazeta sahifalaridagi geografik nomlanish etiborni tortadi. Bugungi kunda biz Janubiy Koreya deb ataydigan davlat terma jamoasi o'sha yillari matbuotda va televidenieda "Quriya" nomi bilan yuritilgani ko'pchilik uchun o'ziga xos kashfiyotdir.

To'rtta gol va 45 daqiqa

Yana bir hayratlanarli va bugungi kunda tasavvur qilish qiyin bo'lgan holat – JCH-1998 saralashi 2-bosqichi doirasida Yaponiya – O'zbekiston uchrashuvi translyaciyasi bilan bog'liq voqeadir. O'sha kuni o'zbekistonlik muxlislar chinakam shok holatini boshidan kechirgan. Gazetada yozilishicha, texnik sabablarga ko'ra o'yinning birinchi bo'limi O'zbekiston televideniesi orqali ko'rsatilmagan. Umidvor muxlislar ekran qarshisiga ikkinchi bo'limni tomosha qilish uchun o'tirishganda esa, hisob allaqachon maydon egalari foydasiga 4:0 ko'rinishini olgan edi. Muallif bu vaziyatni juda jonli tasvirlaydi: "Natija maydon egalari foydasiga 4:0 ekanligidan voqif bo'lib, hayajondan sovuq ter bosdi. Bunday hisob hech kimning xayoliga ham kelmagandi".

Taktika

Gazetaning sport sharhlovchisi SHarofiddin Umurzoqov qalamiga mansub "Bir hujumchi bilan o'ynab bo'ladimi?" sarlavhali maqolada terma jamoaning o'sha vaqtdagi taktikasi keskin tanqid ostiga olinadi. Murabbiylarning himoyaviy o'yini qoralanib, oldinda faqat Igor SHkvirinning o'zi qoldirilgani, hatto sof hujumchi Ravshan Bozorovga ham yarim himoyachi vazifasi yuklatilgani etirozlarga sabab bo'lgan.

Maqolalarda tilga olingan Oleg SHackix, Andrey Fyodorov va Pavel Bugalo kabi ismlar esa bugungi kun muxlislarida o'ziga xos nostalgiya uyg'otadi. Muallifning o'sha davrdagi "Paxtakor" va Braziliya terma jamoasining hujumkor o'yinlarini sog'inib yozgan fikrlari, muxlislarning qachon va qaysi sharoitda bo'lmasin, hamisha chiroyli va hujumkor futbol tarafdori ekanligini yana bir bor isbotlaydi.

Oradan qariyb o'ttiz yil vaqt o'tdi. Raqiblarni zamonaviy nomlari bilan ataymiz, o'yinlarning esa nafaqat birinchi bo'limi, balki o'yinoldi chigalyozdi mashqlarini ham jonli efirda kuzatamiz. Ammo 90-yillar matbuotidagi bu kabi qaydlar o'zbek futbolining shakllanish davridagi ehtiroslar, quvonch va iztiroblar naqadar samimiy bo'lganini bizga eslatib turadi.