“O'zbek kurashining tarixi, buguni va istiqboli” mavzusida konferenciya o'tkazildi + FOTO

Bu haqida O'zbekiston kurash federaciyasi matbuot xizmati xabar bermoqda. Unda milliy uch yarim ming yillik tarixga ega sport turimizning xalqaro maydondagi rivoji, uni ommalashtirish, mamlakatimizda kurashni rivojlantirish bilan bog'liq masalalar o'rtaga tashlandi.

Konferenciya delegatlari 2019 yil dekabr oyida jamoatchilik muhokamasiga qo'yilgan O'zbekiston Respublikasi Prezidentining “Kurash milliy sport turining xalqaro nufuzini yanada oshirish chora-tadbirlari to'g'risida”gi Farmoni loyihasi yuzasidan o'z fikr-mulohazalarini bildirib o'tdilar.

Tadbirda shuningdek, O'zbekiston Kurash federaciyasi va O'zbekiston Respublikasi Milliy gvardiyasi Harbiy-texnik instituti o'rtasidagi hamkorlik memorandumi imzolandi. Unga ko'ra, hamkorlikda o'quv-metodik adabiyotlar va ilmiy-tadqiqotlar amalga oshirish, birgalikda darsliklar yaratishni ko'zda tutilgan.

Konferenciyada o'zbek kurashini rivojlantirish va istiqboliga doir dolzarb masalalar yuzasidan sohaning etuk mutaxassislari, federaciya vakillari va faxriy kurashchilarning ilmiy maruzalari tinglandi. 

Unda xususan, kurashning jangovor yo'nalishini ishlab chiqish va jamoatchilik etiboriga havola qilish haqida takliflar ilgari surildi. Bu borada mutaxassislar 11 yanvar kuni “Sag'bon” sport majmuasida o'tadigan amaliy mashg'ulotlarda mahorat saboqlarini o'tkazishlari aytib o'tildi.

Mazkur anjumanda bir qator vazirlik va tashkilotlar ishtirok etishib mamlakatimizda O'zbek kurashini yanada ommalashtirish yuzasidan hamkorlikda amalga oshiriladigan ishlar yuzasidan fikrlar almashdilar.