O'zbek va jahon sporti afsonasi Oksana CHusovitina 48 yoshda!

CHusovitina Oksana Aleksandrovna 1975 yil 19 iyun kuni Buxoro shahrida tug'ilgan. Sport gimnastikasi bo'yicha Olimpiya o'yinlarida eng ko'p ishtirok etgan sportchi (1992, 1996, 2000, 2004, 2008, 2012, 2016, 2020). 1992 yil Barselonada o'tgan Olimpiya o'yinlari oltin medali sohibasi, 3 karra jahon chempioni. Tayanib sakrash, erkin mashq va parallel to'sinlarda bir necha murakkab elementlar muallifi. Osiyo o'yinlari va Osiyo chempionati g'olibasi.  

Faoliyatini yakunlamasdan turib, gimnastika rivojiga qo'shgan xissasi uchun Xalqaro gimnastika shon-sharaf Zalidan o'rin olgan yagona sportchi (shuningdek, sport gimnastikasida Olimpiya o'yinlarida eng ko'p ishtirok etgani uchun “Ginnesning rekordlari” kitobiga o'z nomini yozdirib qo'ygan).

Oksana Aleksandrovna davlatimiz tomonidan “O'zbekiston iftixori”, "O'zbekiston Respublikasida xizmat ko'rsatgan sportchi" faxriy unvonlari, “Do'stlik”, “Mehnat shuhrati”, “El-yurt hurmati” ordenlari bilan taqdirlangan.

Oksana CHusovitina 8 bor Olimpiya o'yinlarida ishtirok etib, gimnastika tarixi va “Ginnesning rekordlari” kitobiga kiritilgan. Agar u Parij-2024 Olimpiadasida ham ishtirok etsa, o'z rekordini yaqin davr ichida hech kim yaqinlasha olmaydigan qilib yangilaydi. Yana ham hayratlanarlisi, o'shanda u 49 yoshida bu ishni amalga oshirgan bo'ladi.

Fursatdan foydalanib, O'zbekiston faxri Oksana CHusovitinani bugungi tavallud ayyomi bilan tabriklab, unga uzoq umr, sihat-salomatlik va ulkan g'alabalar tilaymiz.